Ulytaý oblysynda habarsyz ketken tórt balyqshy izdestirilip jatyr
«15 qarasha kúni saǵat 11:10-de Ulytaý oblysynyń Tótenshe jaǵdaılar departamentiniń jedel pýltine balyq aýlaýǵa ketip, baılanyssyz qalǵan balyqshylardyń týystarynan habar kelip tústi. 13 qazan kúni Sátbaev qalasynan 4 balyqshy Ulytaý aýdany, Baıqońyr aýyly Dýlyǵaly ózenine balyq aýlaýǵa ketken», - dedi Rýslan Imanqulov.
TJM resmı ókiliniń aıtýynsha, habarsyz ketken balyqshylardy izdeý jumysy júrip jatyr.
«Іzdeý jáne qutqarý jumysyn júrgizý úshin Jezqazǵan qalasynan Ulytaý oblysy TJD qyzmetkerleri men tehnıkteri jiberildi. Araqashyqtyq shamamen 190 shaqyrymdy quraıdy. Іzdeý jumystary júrgizilýde», - deıdi ol.
Osy oraıda Tótenshe jaǵdaılar mınıstrligi qaýipsizdik erejesin taǵy bir eske salady.
Tumanǵa jáne basqa da qolaısyz aýa raıynda sýǵa barýǵa tyıym salynady. Sý qaıyǵy aýdarylǵan jaǵdaıda, bastysy dúrbeleń salmaı jaǵdaıdy baqylaýǵa alý kerek. Aldymen barlyq adamnyń bar-joǵyn tekserý, sodan keıin múmkin bolǵan jaǵdaıda jaǵalaýǵa baǵyt alǵan jón.
Aqaýy bar nemese tekserilmegen sý qaıyqtaryn qoldanýǵa tyıym salynady. Qaıyqtardyń jaramdylyǵyna kóz jetkizý kerek jáne ol júzý quralymen jabdyqtalǵan bolýy tıis. Sýǵa shyqpas buryn týystaryńyz ben jaqyn tanystaryńyzǵa ornalasqan jerińiz jáne qaıtyp oralý ýaqyty týraly habarlańyz.
Eshbir jaǵdaıda qaıyqtyń bortynda otyrýǵa, ony shaıqaýǵa, borttan súńgýge, qozǵalys kezinde bir jerden ekinshi jerge aýysýǵa bolmaıdy. Óıtkeni bul qaıyqtyń aýdarylýyna ákelýi múmkin.
Sondaı-aq, qatań saqtalýy kerek negizgi erejelerdiń biri - qutqarý keýdeshesiniń bolýy. Keýdeshe qaıyqtaǵy árbir adamda bolýy tıis. Keýdesheler yńǵaıly, túımelengen jáne qozǵalysqa kedergi keltirmeýi kerek.
Tótenshe jaǵdaıda «112» pýltine uıaly telefon arqyly tegin jáne táýlik boıy qońyraý shalýǵa bolady.
