Ulytaý oblysynda áleýmettik-ekonomıkalyq damýdyń keshendi jospary qalaı iske asyp jatyr

ASTANA. QazAqparat – Búgin Úkimette Ulytaý oblysynyń áleýmettik-ekonomıkalyq damýyna baǵyttalǵan keshendi jospardyń iske asý barysy qaraldy, dep habarlaıdy QazAqparat Úkimettiń baspasóz qyzmetine silteme jasap.

Premer-Mınıstrge birqatar másele boıynsha atqarylyp jatqan jumystar týraly baıandaldy, atap aıtqanda:

- Sátbaev qalasyndaǵy jylý júıelerin jóndeý;

- oblys ortalyǵyndaǵy jylý elektr ortalyǵynyń qazandyqtaryn jańartý;

- Jezqazǵan – Qyzylorda jáne Jezqazǵan – Qaraǵandy avtomobıl joldaryn, sondaı-aq Úıtas-Aıdos sý qubyryn kúrdeli jóndeý;

- Esqula sý qubyry qurylysyn aıaqtaý;

- Jezqazǵan qalasyndaǵy sharýashylyq-aýyz sý tazartý qurylystaryn qaıta jabdyqtaý jáne ınjenerlik-kommýnıkatsııalyq ınfraqurylymdar salý boıynsha júrgizilip jatqan jumystardyń barysy.

Sondaı-aq, keńeste Jezqazǵan mys qorytý zaýytyn jańǵyrtý jobalaryn júzege asyrý barysy, agroónerkásip keshenindegi ınvestıtsııalyq jobalarǵa jeńildetilgen nesıe berý jáne jalpy kásipkerlerdi qoldaý máseleleri qaraldy.

Budan bólek, óńirde jaıly mektepter, perınataldyq jáne onkologııalyq ortalyqtar, sondaı-aq birqatar sport nysandaryn salý máseleleri talqylandy.

Álıhan Smaıylov Ulytaý oblysynyń ákimdigi 2022-2026 jyldarǵa arnalǵan áleýmettik-ekonomıkalyq damýdyń keshendi josparynda kózdelgen is-sharalardyń ýaqtyly jáne sapaly oryndalýyn qamtamasyz etý kerektigin aıtty. Osy rette ol ınfraqurylymdyq jobalardyń jobalyq-smetalyq qujattaryn ázirleýdi jáne avtojoldardy kúrdeli jóndeý jumystaryn jedeldetý qajettigin aıtty.

«Búgingi talqylaýdy eskere otyryp, múddeli memlekettik organdar men Ulytaý oblysynyń ákimdigi jumys saparynyń qorytyndysy boıynsha berilgen barlyq tapsyrmalardyń oryndalýyn qamtamasyz etýi tıis», - dep túıindedi Premer-Mınıstr.