Ulytaý oblystyq máslıhatynyń tóraǵalyǵyna Baýyrjan Shyńǵysov saılandy

ULYTAÝ. QazAqparat - Búgin Jezqazǵanda VIII shaqyrylǵan depýtattar Ulytaý oblystyq máslıhatynyń tóraǵasyn saılady. Eki úmirkerdiń arasynan Baýyrjan Shyńǵysov kópshilik daýysty jınap, tóraǵa bolyp saılandy, dep habarlaıdy QazAqparat.

Otyrysqa Ulytaý oblysy ákimi qatysty.

Berik Ábdiǵalıuly depýtattardy jumysynyń bastalýymen quttyqtap, halyq qalaýlylaryna óńir turǵyndarynyń ıgiligi úshin qyzmetinde tabys tiledi.

Aýmaqtyq saılaý komıssııasy tóraǵasynyń VIII shaqyrylǵan Ulytaý oblystyq máslıhaty depýtattaryn saılaý qorytyndysy týraly aqparatyn tyńdap, olardyń ókilettigin moıyndaı otyryp, birinshi sessııada Ulytaý oblystyq máslıhaty tóraǵasyn saılaý qaraldy.

Daýys berýge eki kandıdatýra usynyldy: ótken saılanǵan oblystyq máslıhattyń tóraǵasy Baýyrjan Shyńǵysov jáne «Aq jol» Qazaqstan demokratııalyq partııasy» qoǵamdyq birlestiginiń múshesi Bekzat Daırabaıuly. Baýyrjan Shyńǵysovtyń kandıdatýrasy depýtattardyń kópshilik daýsymen qoldaý tapty.

Sonymen qatar, otyrysta turaqty komıssııalardyń quramy qurylyp, bekitildi.

Ulytaý oblysynyń ekonomıkalyq damý, bıýdjet, qarjy, ónerkásip jáne kásipkerlik máseleleri jónindegi turaqty komıssııasynyń tóraǵasy bolyp №3 aýmaqtyq saılaý okrýgi boıynsha depýtat Erkebulan Bodyqov saılandy.

Ulytaý oblysynyń áleýmettik qorǵaý, halyqtyń densaýlyǵyn saqtaý, bilim berý, mádenıet, sport jáne jastar máseleleri jónindegi turaqty komıssııasynyń tóraǵasy bolyp «Amanat» partııasynyń depýtaty Zına Aqylbekova saılandy.

Ulytaý oblysynyń agrarlyq, jer, aýyl sharýashylyǵy, veterınarııa máseleleri jónindegi turaqty komıssııasynyń tóraǵasy bolyp «Aýyl» partııasynyń depýtaty Gúlnaz Omarova saılandy.

Ulytaý oblysynyń turǵyn úı-kommýnaldyq sharýashylyq, qurylys, qala qurylysy, qorshaǵan ortany qorǵaý jáne tabıǵı resýrstardy paıdalaný máseleleri jónindegi turaqty komıssııasynyń tóraǵasy bolyp «Aq jol» partııasynyń depýtaty Aqylbek Amanov saılandy.