Ulytaý, Mańǵystaý, Batys Qazaqstan oblystary aýylǵa bólingen qarajatty tolyq ıgermegen

ASTANA. QazAqparat – Ulttyq ekonomıka mınıstri Álibek Qýantyrovtyń aıtýynsha, 2022 aýylǵa respýblıka bıýdjetinen bólingen 128 mlrd teńgeniń 94 paıyzy ıgerilgen, dep habarlaıdy QazAqparat tilshisi.

«2022 jyly 577 aýyldyq eldi mekende 1 myńnan astam jobany iske asyrýǵa 128 mlrd teńge bólindi.

Osy jyldyń 1 qańtaryndaǵy jaǵdaı boıynsha oblys ákimdikteri bólingen qarajattyń 94% ıgergen», - dedi ol Úkimet otyrysynda.

Qarajattyń joǵary ıgerilýi Atyraý, Qostanaı, Soltústik Qazaqstan, Túrkistan oblystarynda baıqalǵan kórinedi.

«Sonymen qatar qarajattyń eń tómen ıgerilýi Ulytaý, Mańǵystaý jáne Batys Qazaqstan oblystarynda tirkeldi.

Mınıstrlik jyl saıyn aýyldardyń óńirlik standarttar júıesine sáıkes qamtamasyz etilýine monıtorıngin júrgizedi.

Óńirlik standarttar júıesiniń maqsaty – aýyldy aýmaqtardyń áleýmettik-ekonomıkalyq áleýetin damytý jáne qoldaý arqyly aýyl halqynyń ómir súrý sapasyn arttyrýǵa jaǵdaı jasaý.

Jobanyń ótken jyldarda iske asyrylýy nátıjesinde óńirlerdiń kórsetkishteri standarttar júıesiniń talaptaryna sáıkes joǵarylady. Máselen, ortasha qamtamasyz etý 2021 jyly 64,1% qurady. Bul kórsetkish 2019 jylmen salystyrǵanda 9,3% joǵary», - dedi Álibek Qýantyrov.