Ulytaý aýdanynda kezekte turǵandar úshin 4 kóppáterli úı salynady

ULYTAÝ. QazAqparat – Bıylǵy jyldyń ekinshi jartysynda Ulytaý aýylynda 48 páterlik eki qabatty tórt úı paıdalanýǵa beriledi dep josparlanýda. Turǵyn úı kezekte turǵandar qataryndaǵy áleýmettik osal toptaǵy otbasylarǵa bólinetin bolady, dep habarlaıdy QazAqparat tilshisi.

Ótken jyldyń jeltoqsan aıynda Ulytaýda kóp balaly otbasylarǵa turǵyn úı satyp alýǵa jáne bólýge arnalǵan úsh qabatty 24 páterli turǵyn úı paıdalanýǵa berildi. Sondaı-aq, jeke qurylys salýshylar eki qabatty segiz jáne on alty páterli tórt turǵyn úı salý boıynsha jobany iske asyrýda. Bul týraly Óńirlik kommýnıkatsııalar qyzmeti alańynda ótken onlaın-brıfıngte Ulytaý aýdanynyń ákimi Sovetbek Medebaev málim etti.

«Turǵyn úılerdegi osy 48 páterdi muqtajdarǵa satyp alý jáne bólý josparlanýda. Ótken jyly paıdalanýǵa berilgen turǵyn úıdiń jalpy aýdany 13 162 sharshy metrdi qurady», – dep atap ótti Sovetbek Medebaev.

Sondaı-aq, spıker uzyndyǵy 420 shaqyrymnan asatyn Qyzylorda men Jezqazǵan arasyndaǵy avtojoldy qaıta jóndeý qajettigine toqtaldy.

«Joldy jóndeý Ulytaý – Jezqazǵan óńiri úshin, atap aıtqanda bizdiń aýdan úshin úlken mańyzǵa ıe. Avtojoldy qaıta jańartýdy qarjylandyrý úshin Azııa Damý Banki men Eýropa Qaıta Qurý jáne damý bankiniń qaryz qarajaty tartyldy. Úkimet kelisimine sáıkes bıyl kúrdeli jóndeý jumystary bastalady. Jóndelgen jol týrızmdi damytýǵa septigin tıgizedi», – dep atap ótti Sovetbek Medebaev.