Ulytaý aýdanynda qazaq kúresi mektebi men stadıon salynady
ASTANA. QazAqparat - «Rýhanı jańǵyrý» baǵdarlamasy sheńberinde Ulytaý aýdanynda eki sport nysanynyń qurylysy josparlanyp otyr. Ol jaıly Aımaqtyq kommýnıkatsııalar ortalyǵynda ótken brıfıng barysynda aýdan ákimi Ánýar Omar málimdedi. Bul týraly QazAqparat ákimdik saıtyna silteme jasap habarlaıdy.
«Rýhanı jańǵyrý» baǵdarlamasyn júzege asyrý sheńberinde bizdiń aýdan boıynsha toǵyz joba usynyldy. Olardyń tórteýi júzege asyryldy. Taǵy beseýi kelesi jylǵa josparlanyp otyr. Onyń qatarynda - 50 orynǵa shaqtalǵan demalys aýmaǵynyń qurylysy, qazaq kúresi mektebi men Qarsaqbaı aýylyndaǵy stadıon qurylysy da bar, - dedi Ánýar Omar.
Ákimniń aıtýynsha, bul jobalardyń barlyǵy demeýshiler qarajatyna salynady.
