Ulytaý aýdanynda boranda adasqan áke men bala aman tabyldy
QARAǴANDY. QazAqparat – Qaraǵandy oblysynyń Ulytaý aýdanynda 38 jastaǵy er adam men onyń 16 jasar balasy joǵalyp ketti. Olar 24 aqpanda Jangeldın aýyldyq okrýginiń qystaǵynan traktormen shyǵyp, qaıtyp oralmaǵan, dep habarlaıdy QazAqparat tilshisi.
Іzdestirý-qutqarý jumysyna TJD, polıtsııa bólimsheleriniń, jergilikti atqarýshy organdardyń, jergilikti turǵyndar men uıymdardyń kúshi tartyldy.
Іzdeýge barlyǵy 24 adam jáne 8 tehnıka jumyldyryldy.
Qutqarý jumysy aýa raıynyń qolaısyzdyǵymen kúrdelene tústi.
«Búgin, 25 aqpan saǵat 19:30-da izdeý toby joǵalǵan adamdardy shyqqan jerinen 18 km qashyqtyqtan tapty. Boran men aıazǵa baılanysty er adamdar adasyp, kórshi qystaýda qalyp, aýa raıynyń jaqsarýyn kútý jóninde sheshim qabyldaǵan. Tabylǵan adamdarǵa medıtsınalyq kómek qajet bolmady», - dep málim etti Qaraǵandy oblystyq TJD baspasóz qyzmeti.
Qaraǵandy oblysynyń TJD mamandary óńir turǵyndaryna aýa raıy nasharlaǵan kezde eldi mekenderden tys jerlerge jaıaý jáne jol júrýden bas tartýdy, aýa raıynyń ózgerýine sáıkes kıinýdi usynady.
Barlyq oqıǵalar men TJ faktileri týraly 112 nemese 8 (7212) 43-36-36, 43-37-37 telefondary arqyly habarlasýǵa bolady.
TJD jedel shtabynyń qaýyrt jeli telefony - 51-72-23.
