Ulymdy er bolsa eken dep Sardar qoıdym – polıtsııa kapıtany Abzal Úmbetqalıev
ORAL. QazAqparat – Polıtsııa qatarynda úlgili qyzmet atqaryp júrgender az emes. Solardyń biri, Tasqala aýdandyq polıtsııa bóliminiń jedel kezekshisi Abzal Úmbetqalıevpen QazAqparat tilshisi suhbattasqan edi.
-Abzal Ersaıynuly, polıtsııa qataryna qalaı keldiń, bala kezden armandadyń ba?
-Iá, balalyq shaqtan bastap armandadym deýge bolady. Biraq bizdiń shańyraqta eshkim polıtsııa qyzmetkeri bolǵan joq. Ákem qoı baqty. 2006 jyly Atameken aýylyndaǵy orta mektepti bitirgennen keıin tártip saqshysy bolýǵa bekindim.
QR Іshki ister mınıstrligi Almaty akademııasyn 2010 jyly támamdaǵannan keıin elge oraldym. 2016 jylǵa deıin ýchaskelik polıtsııa ınspektory qyzmetin atqardym, qazir
jedel kezekshimin.
-Karantındik statsıonarda bolǵan ekensiń, onda qyzmet babymen be, álde jatqyzdy ma?
-Aýrýhanany kúzettim. Sonymen qatar kovıd indeti bizdiń áriptesterimizdiń arasynda da anyqtalǵannan keıin 16 kún jatyp shyqtym. Eki ret synama aldy, teris nátıje kórsetti.
Árıne, indetpen kúresý elge ońaı tıip jatqan joq. Degenmen áriptesterim emdelip shyǵyp, qaıta qatarǵa qosyldy.
-Aty jaman indetti juqtyrmaý úshin ne qajet dep oılaısyń?
-Ol úshin eń bastysy, saqtyq kerek. Maska, qolǵap kıip, antıseptık qoldaný qajet. Halyq kóp jınalatyn jerlerge barmaǵan jón, áleýmettik araqashyqtyqty umytýǵa bolmaıdy. Muny jurttyń bári biledi dep oılaımyn, tek bári birdeı saqtaı bermeıdi.
-Polıtsııa qyzmetkeri bolý ońaı ma, kúnbe-kún halyqpen tyǵyz baılanysta jumys jasaısyńdar, qıyndyq ta az emes shyǵar?
-Ómir bolǵan soń, qıyndyq kezdespeı turmaıdy. Ókinishke qaraı, máseleniń mán-jaıyna barmaı, uıaly telefonǵa jazyp alyp, áleýmettik jelige júkteıtinder kóbeıip ketti.
Túsinistikpen jumys istegenge ne jetsin, bizdiń kózdegenimiz de – tynyshtyq, halyqtyń qamy, barlyq is-áreketimiz qoǵamdaǵy tártipti saqtaýǵa baılanysty bolǵandyqtan, mindetimizdi buljytpaı oryndaýǵa tyrysamyz.
Aldaǵy arman-maqsatymyz da – adal qyzmet etip, ómir belesterinen abyroımen ótý.
-Óz otbasyń jóninde aıta ketseń, kishi ulyń tótenshe jaǵdaı kezinde kóringen eken?
-Iá, ol kezde men jumysta boldym. Kezekshilikke túsip júrdik, qyzmetkerler de jetispeı jatty.
Jarym Sáýle halyqqa qyzmet kórsetý ortalyǵynda eńbek etedi, qazir dekrettik demalysta. Úlken ulym Esimjan segizde, qyzym Sábına beste. Al dúnıege kelgenine eki aı
tolǵan ulymnyń atyn qazaqtyń batyry bolsyn dep Sardar
qoıdym. Bolashaqtan, urpaǵymyzdan úlken úmit kútetin
halyqpyz ǵoı, bári de jaqsy bolsyn! Elimiz aman, jurtymyz tynysh bolsyn!
