«Ulylarmen suhbat» atty kórmege Peterbor men Máskeý sýretshileriniń 90-ǵa jýyq týyndylary qoıylady
ASTANA. QazAqparat - «Ulylarmen suhbat» atty kórmege Peterbor men Máskeý sýretshileriniń 90-ǵa jýyq tańdaýly týyndylary qoıylady. Bul týraly búgin Ortalyq kommýnıkatsııalar qyzmetinde Astanada josparlanǵan kórmege oraı ótken baspasóz máslıhatynda málim boldy.
Aıta keterligi, Elbasy aıqyndaǵan «100 qadam» Ult jospary aıasyndaǵy bir baǵyt Astana qalasyn Eýrazııanyń mádenı ortalyǵyna aınaldyrý bolyp tabylady. Osy sharalarǵa oraı, búgin Astanadaǵy QR Ulttyq mýzeıinde «Álemdik mádenıet jáne búgingi sýret óneri» jobasy sheńberinde «Ulylarmen suhbat» atty taqyryppen kórme ashylady. Atalǵan joba aıasynda Astanadaǵy mýzeıde ótken ǵasyrdyń 70-80 jyldary jaryqqa shyǵyp, kópshilik moıyndaǵan qylqalam sheberleriniń 90-ǵa jýyq týyndylary qoıylyp, Parallel Worlds shyǵarmashylyq tobyna birikken Peterbor jáne Máskeý sýret óneri mektebiniń jarqyn ókilderi óz ónerlerin jurtshylyqqa pash etedi.
QR Ulttyq mýzeıi zamanaýı óner ortalyǵynyń jetekshisi Roza Ábenovanyń aıtýyna qaraǵanda, «Ulylarmen suhbat» kórmesine «Peterbordyń erkin sýretshileri» áleýmettik jobasy tarapynan bastamashylyq jasalǵan. «Kórmege Peterbor men Máskeýdiń 19 sýretshisiniń toqsanǵa jýyq jumystary qoıylady. Olardyń árqaısysy reseılik zamanaýı óner sahnasynyń aıtýly tulǵalary bolyp tabylady ári olardyń sheberligi búgingi jas sýretshiler úshin keremet úlgi. Mýzeıde kórmeni ótkizý arqyly Qazaqstannyń sýretshileri men kelýshileri Reseıdiń eki mádenıet ortalyǵynyń kórnekti sýretshileri usynǵan tamasha týyndylarmen jaqynyraq tanysa alady», - dedi Roza Ábenova.
Onyń aıtýynsha, Qazaqstannyń halyqaralyq mádenı jáne ıntellektýaldyq keńistikke ıntegratsııasy eń birinshi kezekte álemdik jańa úrdisterge den qoıý arqyly damı túsedi. Al elimizde zamanaýı ónerdi damytý úshin álemniń ilgerilegen óner ókilderin Astanaǵa jıi shaqyryp, olardyń el maqtaǵan týyndylarymen etene tanys bolý mańyzdy. «Qazaqstannyń sýretshiler qaýymdastyǵy úshin sheteldik áriptesteriniń týyndylaryn kózben kóre, tamashalaı tanysa alýǵa da úlken múmkindik bolaıyn dep otyr. Buny bir jaǵynan sýretshilerimizdiń jańa jobalaryn týdyrýǵa septigin tıgizer rýhanı azyq dep sanasaq ta bolady», - dedi R. Ábenova.
Toqtala ketetin jaıt, aldaǵy qyrkúıek aıynda dál osyndaı kórmeler Astanadaǵy mýzeıde jalǵasyn tabatyn bolady. Al «Ulylarmen suhbat» kórmesi Astanadan soń Almatyda ótkizý josparlanyp otyr.
