Ulyqpan Joldasov: Baýyrjan Retbaevtyń 5 mıllıonynan 5 tıyn da almaımyn
ASTANA. QazAqparat - «Baýyrjan Retbaevtyń 5 mıllıonynan 5 tıyn da almaımyn», - deıdi tanymal ánshi Ulyqpan Joldasov. Aıta keteıik, kúni keshe Ulyqpan Joldasov prodıýserlik etetin «Batys» tobynyń ánshisi Baýyrjan Retbaev «Qazaqstan daýysy» jobasynyń jeńimpazy atanyp, 5 mln. teńgege ıe bolǵan bolatyn.
Sondaı-aq «Qazaqstan daýysy» jobasy aıaqtalǵan soń «Batys» tobynda ózgerister oryn aldy. Oǵan birden-bir sebep - top ánshisi Baýyrjan Retbaevtyń jeńimpaz bolýy. Bul jańalyqty toptyń prodıýseri Ulyqpan Joldasov aıtty, dep habarlaıdy baistars.kz.
Batys degen aty úshin biraz synǵa ushyraǵan top endi «Daýys.KZ» dep atalady. Bul - Ulyqpan myrzanyń Baýyrjannyń jeńisine jáne «Qazaqstan daýysynyń» qurmetine arnaıy daıyndaǵan syıy. Sebebi toptaǵy eki ánshi de sol jobanyń qatysýshylary. Berdibek Qulǵaraev ótken jylǵy «Qazaqstan daýysy» jobasynda baq synap, jeńiske bir taban jaqyn kelse, Baýyrjan Retbaev - barlyq kórermendi moıyndatqan bıylǵy jeńimpaz. Bir qyzyǵy, Ulyqpan Joldasov Baýyrjannyń jeńýine tilektes bolǵanymen, birde-bir ret daýys bermepti.
«Daýys berem desem, 140 teńgem joq emes. Biraq meniń qoldaýymdy Ulyqpan óziniń balasyna buryp otyr dep túsinýi múmkin. Meniń bir ǵana daýysymnan eshteńe ózgerip ketpeıdi ǵoı», - deıdi Ulyqpan Joldasov.
Baýyrjannyń jobadan bosap, toptyń shyǵarmashylyq jumystaryna tolyqtaı kirisýin asyǵa kútip otyrǵan jetekshisi: «Keıbir kisiler jazyp jatty, Baýyrjanǵa qatty qoldaý kórsetip jatyr, Ulyqpanǵa aqsha kerek bolǵan shyǵar dep. Biraq men aıta keteıin, jeńimpazdyń 5 mıllıonynan 5 tıyn da almaımyn. Ol júldege meniń, Daýys.KZ tobynyń eshqandaı qatysy joq, ol - Baýyrjannyń eńbegi. Ózine kıim álde kólik alady ma, kóshege shashyp jiberedi me, órtep jiberedi me ózi biledi», - dedi.
