Ulyqbek Esdáýlet: Kitaphana-bilim men ǵylym ordasy
Ulyqbek Esdáýlettiń aıtýynsha, Memleket basshysynyń bıylǵy Joldaýy qoǵamdaǵy ózekti máselelerdi dóp basyp aıtýymen erekshelendi. Onyń ishinde mádenıet, til men ádebıette bar.
«Prezıdent óz Joldaýynda bolashaǵyn Otanymyzben baılanystyratyn árbir azamat qazaq tilin úırenýge den qoıýy kerek dedi. Bul otanshyldyqtyń basty belgisi dep qadap aıtty. Bul ras. Ol aqıqat. Súbeli sóz astaryna úńilsek, úlken másele jatyr. Ókinishke oraı, bizde qyzmette júrgen, bılikte júrgen adamdardyń ishinde qazaq tilin úırenýge den qoımaı júrgender barshylyq. Sondyqtan meniń oıymsha, memlekettik tildi úırenýge yqpal etetin amal, ádis tipti mehanızm tetigin taýyp, qoldaný kerek. Memlekettik tildi bilmeıtin tulǵa, memlekettik qyzmetke qabyldanbaıdy degen sııaqty nárselerdi engizý kerek shyǵar. Sol kezde tilge degen qurmet arta túsedi dep oılaımyn» - deıdi aqyn.
Sondaı-aq, Jazýshylar odaǵynyń tóraǵasy daryndy jastardy qoldaýǵa qatysty pikir bildirdi.
«Prezıdent jas ári daryndy músinshiler, sýretshiler, teatr qyzmetkerleri, mýzykanttar, qalamgerler jańa janr túrlerin ıgerip, udaıy izdenis ústinde júretinin basa aıtty. Osyndaı talantty jastardyń tasada qalyp qoıatyny shyndyq. Memleket basshysy tapsyrǵan mindetter oryndalsa, ádebıet pen mádenıet salasy odan ári ilgerileı túsetini sózsiz»,- deıdi ol.
Ulyqbek Esdáýlet Prezıdent mádenıet qyzmetkerleri, qoryqshylar, kitaphanashylar, kólik júrgizýshilerdiń jalaqysyn 2022-2025 jyldar aralyǵynda 20 paıyzǵa arttyrýdy tapsyrǵanyn tilge tıek etti.
« Kitpahanashylardyń jalaqysy ósetin boldy. Kitaphana bul úlken sala bile bilgen adamǵa. Kitaphana- bilim men ǵylym ordasy. Jazýshylardyń týyndysyn saqtaıtyn, nasıhattaıtyn oryndardyń biri- kitaphana. Shyǵarmany oqyrmanǵa jetkizýshi ol- kitaphanashy. Olardyń eńbegin eskerip, jalaqysyn kóterý óte dúrys»,- dedi spıker.
