Ulyqbek Esdáýlet: Beıimbet - alyptar shoǵyryn bastaýshylardyń biregeıi
«Beıimbet Maılınniń murasy – ulttyń asyl qazynasy» ǵylymı-praktıkalyq konferentsııasynda Qazaqstan Jazýshylar odaǵynyń tóraǵasy Ulyqbek Esdáýlet sóz sóılep, Beıimbet Maılınniń qazaq ádebıeti men qoǵamdyq ómirindegi eńbegi týraly sóz etti.
«Beıimbet Maılın – qazaq jazba ádebıetiniń basynda turǵan adam. Alyptardyń shoǵyryn bastaýshylardyń biregeıi. Sondyqtan da bul sharanyń mańyzy bólek. Bı-aǵań óz dáýirindegi shyndyqty jerine jetkize sýrettedi. Ásirese, halyqtyń basyna týǵan almaǵaıyp kezeń – asharshylyqty barynsha shynshyl beıneledi. Qazaq ultynyń taǵdyryna kese-kóldeneń turǵan náýbetter jazýshy nazarynda boldy. Ol aqıqatty búkpesiz aıtty. Qazaq prozasyndaǵy áńgime janrynyń negizin salǵan eki adamnyń biri osy Beıimbet Maılın edi. Onyń áńgimeleri ómir shyndyǵyn dóp basty. Shyǵarmalarynyń realıstik tegeýrini, kórkemdik bıik óresi, taqyrybynyń áralýandyǵymen daralandy. Ózi ómir súrgen qoǵamdy áńgimelerine arqaý etip, entsıklopedııalyq kemeldikpen somdaı bildi. Mine, biz Bı-aǵańa osy úshin de qaryzdarmyz», - dedi Ulyqbek Esdáýlet.
Sonymen qatar, Jazýshylar odaǵynyń tóraǵasy 80 jyl boıy Taran esimin ıelenip kelgen aýdan ortalyǵyna onyń tarıhı ataýy qaıtarylǵanyn atap ótti.
Konferentsııada Beıimbet Maılın kezinde jaýapty hatshy bolǵan respýblıkalyq «Egemen Qazaqstan» gazetiniń bas redaktory Aıbyn Shaǵalaqov pen QR BǴM Memleket tarıhy ınstıtýtynyń jetekshi ǵylymı qyzmetkeri Qundyzaı Erimbetova, taǵy basqa elimizdiń túkpir-túkpirinen kelgen zııalyq qaýym, ádebıetshiler men tarıhshylar sóz sóılep, Bı-aǵanyń kópshilik bile bermeıtin qyrlaryn áńgimeledi.
Shara sońynda bıyldyń ózinde aýdannyń áleýmettik-ekonomıkalyq damýyna 12 mln teńge baǵyttaǵan «Maılın» JShS dırektory, metsenat, bıylǵy «Jomart júrek» jobasynyń «Jyl tulǵasy» atanǵan Petr Býshkınge Beıimbet Maılın atyndaǵy Qor arnaıy mereıtoılyq tósbelgisin tabystady.
