Ulybrıtanııanyń jańa Elshisi: Qazaqstannyń qonaqjaılyǵyna tańǵaldym
ASTANA. QazAqparat - Qazaqstandaǵy Ulybrıtanııa jáne Soltústik Irlandııa Birikken Koroldiginiń Elshisi Maıkl Djon Gıfford qyzmetine resmı kiristi, dep habarlaıdy QazAqparat.
«Astanaǵa kelgenime birneshe saǵat qana boldy. Alaıda, qazirdiń ózinde elderimizdiń qonaqjaılyǵyna tańǵaldym jáne men úshin osy jerde jumysymdy bastaý zor qurmet. Bizdiń ekijaqty qarym-qatynasymyzdyń damý deńgeıi qýantady jáne ony odan ary tereńdetýge zor áleýet bar ekendigin kórip otyrmyn», - dedi Elshi búgin Aqordada Qazaqstan Prezıdenti Nursultan Nazarbaevqa senim gramotasyn tapsyrý rásiminen keıingi BAQ ókilderine arnalǵan brıfıngte.
Onyń aıtýynsha, Ulybrıtanııa Qazaqstan ekonomıkasyna qarjy salǵan ınvestıtsııa kólemi boıynsha altynshy orynda tur. Elimiz táýelsizdik alǵan ýaqyttan beri Ulybrıtanııa 20 mlrd dollardan astam ınvestıtsııa salǵan.
«Munaı men gaz salasy ǵana emes, sonymen qatar aýyl sharýashylyǵy, ІT-tehnologııalar, qarjy sektoryn damytý syndy salalarynda da etene seriktespiz. Brıtandyq kompanııalar «Astana» halyqaralyq qarjy ortalyǵyn uzaqmerzimdi qoldaýǵa jumyldyrylǵan. AHQO-nyń quqyqtyq negizi retinde aǵylshyn quqyǵynyń qabyldanýy bizdiń ekijaqty yntymaqtastyǵymyzdy odan ary nyǵaıta túsedi. Bul Ortalyq Azııada sheteldik ınvestorlar úshin aǵylshyn quqyǵy qoldanylatyn birinshi tájirıbe bolmaq. Ulybrıtanııa AHQO qyzmetkerleri úshin arnaıy trenıgter uıymdastyryp, tájirıbesimen bólisýge daıyn», - dedi Elshi.
Munan bólek, ol Qazaqstan men Ulybrıtanııanyń álemdik saıasatqa qatysty ekijaqy qarym-qatynasy óte jasqy deńgeıde ekendigin atap ótti.
«Qazaqstandy 2018 jyldyń qańtarynda BUU Qaýipsizdik keńesine tóraǵalyq etýimen quttyqtaǵym keledi. Biz Qazaqstanmen seriktestigimizdi joǵary baǵalaımyz. Ulybrıtanııa BUU Qaýipsizdik keńesiniń turaqty múshesi jáne biz BUU alańynda uzaqmerzimdi beıbitshilik pen yntymaqtastyqty damytýdaǵy tereń yntymaqtastyǵymyzdy jalǵastyrýǵa nıettemiz», - dedi Djon Gıfford.
Aıta keterligi, Ulybrıtanııa Elshisinen senim gramotasyn qabyldaǵan Elbasy Nursultan Nazarbaev: «Ulybrıtanııa álemdegi mańyzdy áriptesimizdiń biri ekeni sózsiz. Eki eldiń yntymaqtastyǵy ózara qurmet pen senimge berik negizdelgen. Búginde Ulybrıtanııa Qazaqstannyń iri ınvestorlarynyń jáne saýda áriptesiniń biri bolyp sanalady. Meniń 2015 jylǵy Londonǵa saparym osy jemisti yqpaldastyq pen eki eldiń qarym-qatynasyna tyń serpin berdi. Bizdiń saıası dıalogymyz eki jaqty formatta tabysty damýda», - dep atap ótken edi.
