Ulybrıtanııanyń vegetarıandary 5 fýnttyq qaǵaz aqshaǵa narazy
ASTANA. QazAqparat - Ulybrıtanııanyń tek shóp-shalańmen qorektenetin azamattary 5 fýnttyq qaǵaz aqshaǵa narazy. Óıtkeni banknotty basyp shyǵarý kezinde janýarlardyń maıy paıdalanylady eken, dep habarlaıdy Habar 24 telearnasy.
Olar mundaı aqshany aınalymnan shyǵaryp tastaýdy talap etip otyr. Narazy top ujymdyq hat jazyp oǵan 16 myń adam qol qoıyp úlgeripti. Plastıkten jasalǵan atyshýly banknot qyrkúıek aıynda aınalymǵa shyǵarylǵan bolatyn. Aldyńǵy betinde Elızaveta ІІ hanshaıym, al kelesi betinde Brıtanııanyń burynǵy premer-mınıstri Ýınston Cherchıll beınelengen. Bir ereksheligi, qaǵaz aqsha ylǵalǵa tózimdi jáne jyrtylmaıdy. Endi, mine, onyń quramynda janýarlardyń maıy bar ekendigi de belgili bolyp otyr.
Daýdyń basy ınternet qoldanýshylardyń biri Týıtterde jelisi arqyly jańa aqsha birliginiń quramy týraly qoıǵan suraǵynan bastalǵan. Ásirese, ony «banknot jasaýda janýarlardyń maıy paıdalanyla ma, joq pa?» degen saýal mazalapty. Brıtanııanyń ortalyq banki «ıá» dep jaýap beredi. Biraq maıdyń kólemi óte az ekendigin jáne ondaı maı sabyn men balaýyz maıshamdarynda da qoldanylatynyn aıtqan.
Janýarlardyń quqyn qorǵaýshylardy bul jaýap qanaǵattandyrmaı, olar sol kúni-aq ujymdyq hatpen narazylyq tanytty. Óltirilgen baıǵus ańdarǵa jany ashyǵandardyń pikirleri men olardyń Anglııa bankin aıyptaǵan jazbarlarynda shek bolmady.
Internet qoldanýshylary aınalymnan qaǵaz aqshany alyp tastaýdy jáne bolashaqta ondaıǵa barmaýdy talap etedi.
Djıll Morbeı tek shóp-shalańmen qorektenedi jáne janýarlardyń etin jeýge túbegeıli qarsy. Kollı tuqymdas ıti bar áıel ańdardy óltirýdi qatygezdiktiń shyńy dep esepteıdi. 63 jastaǵy qaıyrymdylyq uıymynyń qyzmetkeri Anglııa bankindegiler maldyń maıynyń ornyna basqa balama tabýlary kerek edi degen oıda.
«5 fýnttyq aqsha úshin janýarlardy óltirý aqylǵa syıymsyz nárse dep oılaımyn. Aqsha basyp shyǵarýdyń basqa da joldaryn tabýǵa bolady ǵoı. Meniń eki balam, eki nemerem bar jáne óz mysalymda ańdarǵa qamqor bolýdy úıretemin. Shyny kerek, meni bul jańalyq qatty qynjyltty», - deıdi Djıll Morbeı.
Qarjy sarapshylarynyń biri bul oqıǵa Ulybrıtanııanyń negizgi bankin shynymen de yńǵaısyz jaǵdaıǵa tiredi dep otyr.
«Bul - Anglııa banki basshysy úshin shynymen de úlken qatelik. Ol mundaıdyń bolatynyn aldyn ala boljaýy kerek edi. Banktegiler artyq qylamyn dep tyrtyq qylyp alǵandaı. Qalaı bolǵanymen de aqsha shyǵarý úshin ańdardy óltirýdiń qajeti joq edi. Eger bank bolashaqta aırandaı tógilgen abyroı-bedelin qaıtaryp alǵysy kelse, sáıkesinshe sheshim qabyldaýlary kerek», - qarjy sarapshysy Djasper Loýler.
Ujymdyq hattyń avtory 47 jastaǵy Dýg Moý jaqtastarynyń sany 16 myńǵa jetedi dep oılamapty. Jáne olar jaqynda ǵana basylyp shyqqan 440 mln fýnttyń aınalymnan shyǵarylyp tastalatynyna senbeıdi. Biraq bolashaqta aqsha úshin ań óltirilmese eken dep tileıdi.
