Ulybrıtanııanyń premer-mınıstri segiz kandıdattyń ishinen saılanady

LONDON. QazAqparat - Ulybrıtanııanyń bıleýshi Konservatıvtik partııasy eldiń jańa premer-mınıstri laýazymyna segiz kandıdat, onyń ishinde syrtqy ister mınıstri Lız Trass, qarjy mınıstri Nadım Zahavı jáne burynǵy qarjy mınıstri Rıshı Sýnak ta básekege túsetinin málimdedi, dep habarlaıdy QazAqparat BBC News-ke silteme jasap.

«1922 komıtettiń» (Konservatıvtik partııanyń basqarý organy) basshysy Grem Bredıdiń aıtýynsha, parlamenttik fraktsııasynyń músheleri arasyndaǵy daýys berýdiń birinshi kezeńi 13 shildede ótip, segiz kandıdattyń saılaýǵa qatysý múmkindigi bolady. Olardyń árqaısysy 12 mınýttan sóıleıdi. 30-dan az daýys alǵan úmitkerler birinshi týrdan shyǵarylady.

Odan keıin taǵy birneshe týr ótedi, nátıjesinde premer-mınıstr laýazymyna tek eki úmitker qalýy kerek. Olardyń kandıdatýralary Konservatıvtik partııa músheleriniń (tek depýtattar ǵana emes) jalpy daýys berýine beriledi. Eldiń jańa premer-mınıstriniń esimin saılaýdyń sońǵy nátıjeleri 5 qyrkúıekte belgili bolady.

7 shildede Borıs Djonson seksýaldyq zorlyq-zombylyq jasady dep aıyptalǵan saıasatkerdiń parlamenttegi mańyzdy laýazymǵa taǵaıyndalýyna qatysty janjal aıasynda Konservatıvtik partııanyń kóshbasshysy qyzmetinen ketetinin málimdegen bolatyn.

Parlamentarııler Djonsonnyń buǵan deıin de osyǵan uqsas ister boıynsha aıyptalǵanyna qaramastan bul depýtatty joǵary laýazymǵa taǵaıyndaǵanyna narazylyq bildirip, ishki tergeýde taǵylǵan aıyptar negizdi degen qorytyndyǵa keldi.

Djonson bul týraly eshteńe bilmegenin aıtty, biraq keıin oqıǵa týraly oǵan jeke habarlanǵany týraly kóptegen dálelder keltirildi. Premer-mınıstr keshirim suraýǵa májbúr bolyp, artynsha onyń kabınetindegi 50-den astam mınıstr otstavkaǵa ketti.

Foto: english.news.cn