Ulybrıtanııanyń Premer-mınıstri Borıs Djonson qarqyndy terapııa bólimine aýystyryldy
LONDON. QazAqparat – Jeksenbi kúni Sent-Tomas aýrýhanasyna jatqyzylǵan Ulybrıtanııanyń Premer-mınıstri Borıs Djonson qarqyndy terapııa bólimine aýystyryldy, dep habarlaıdy QazAqparat Euronews-ke silteme jasap.
Telearnanyń habarlaýynsha, bir kún ishinde saıasatkerdiń jaǵdaıy nasharlap ketkennen keıin dárigerler osyndaı sheshim qabyldaǵan. Premer Syrtqy ister mınıstri Domınık Raabadan eger qajettilik týyndasa, Úkimet basshysynyń mindetin atqarýdy suraǵan. Djonson ókpeni jasandy jeldetý qajet bolǵan jaǵdaıda, saqtyq sharalary retinde qarqyndy terapııa bólimine ornalastyrylǵan.
Buǵan deıin Djonson Twitter-degi paraqshasynda josparly synama tapsyrý úshin dárigeriniń keńesi boıynsha aýrýhanaǵa barǵanyn jazǵan, sebebi premerde áli de syrqat belgisi ketpegen. Saıasatker óziniń jaqsy kóńil - kúıde ekenin atap ótti. Djonson, sondaı-aq oǵan jáne basqa adamdarǵa kómek kórsetken dárigerlerge alǵys bildirip, brıtandyqtardy shekteý sharalaryn saqtaýǵa shaqyrdy.
Eske sala keteıik, koronavırýsty hanzada Ýels Charlz, Densaýlyq saqtaý mınıstri Mett Henkok jáne Anglııanyń bas sanıtarlyq dárigeri Krıs Ýıttı juqtyrǵan bolatyn. Olar emdelip shyqty. Shotlandııa isteri boıynsha brıtandyq mınıstr Alıster Djek jáne premerdiń bas keńesshisi Domınık Kammıngs burynǵysha oqshaýlaýda jatyr.
Koroldiktiń aýmaǵynda karantın 23 naýryzdan bastap engizildi. Ulybrıtanııada COVID-19-dan táýligine 439 adam kóz jumǵan. Koronavırýs pandemııasy kezinde qaıtys bolǵandardyń jalpy sany – 5 373. Elde koronavırýsty 51 608 adam juqtyrǵan.
