Ulybrıtanııanyń ǵarysh salasyndaǵy Virgin Orbit kompanııasy jumysyn toqtatady

LONDON. QazAqparat – Brıtan mıllıarderi ser Rıchard Brensonǵa tıesili Virgin Orbit kompanııasy jańa ınvestıtsııa tarta almaǵandyqtan qyzmetkerleriniń 85% jumystan shyǵarýdy josparlap otyr, dep habarlaıdy QazAqparat BBC News-ke silteme jasap.

BAQ aqparaty boıynsha, fırma sondaı-aq, jumysyn da toqtatady.

Bıyl Virgin Orbit kompanııasynyń tarıhtaǵy alǵashqy sátsiz ushyrylymy boldy. Kompanııa Ulybrıtanııa aýmaǵynan bortynda spýtnıgi bar zymyran ushyrǵan edi. LauncherOne kompanııasynyń zymyrany ǵaryshqa ushyp barǵanymen, maqsatty orbıtasyna jete almady.

Bul ushyrylymǵa zor úmit artylǵan edi. Sebebi ol Ulybrıtanııany jahandyq «ǵarysh» oıynshysyna aınaldyratyn – zymyran óndirýden bastap, zymyrandardy jasaý jáne jańa ǵarysh aılaqtaryn qurýǵa múmkindik beretin mańyzdy qadam bolýy kerek edi.

Nıý-Iorktegi saýda-sattyq jabylǵannan keıin kompanııa aktsııalary 44% astamǵa quldyrady.

Virgin Orbit-tiń barlyq bólimshelerinde jumys isteıtin shamamen 675 qyzmetker jumystan shyǵarylady.

«Bizde túbegeıli jáne aýyr sharalar qabyldaýdan basqa amal qalmady», - dep málimdedi Virgin Orbit atqarýshy dırektory Den Hart qyzmetkerlermen kezdesken kezinde.

2017 jyly negizi qalanǵan fırma tabys ákelmegen. Ol shaǵyn spýtnıkterdi ushyrýǵa arnalǵan zymyrandardy jasaıtyn jáne quramyna Virgin Atlantic avıakompanııasy men Virgin Galactic ǵarysh týrızmi kompanııasy kiretin Rıchard Brensonnyń bıznes-ımperııasynyń bir bóligi edi.