Ulybrıtanııanyń Azamattyq avıatsııa agenttigi Qazaqstanǵa qoldaý kórsetedi
QR Azamattyq avıatsııa komıtetiniń Facebook-tegi paraqshasynda jarııalanǵan aqparatqa sáıkes, jańa retteý júıesi qazaqstandyq áýe kóligi sektorynyń ósýine qoldaý kórsetip, Qazaqstannyń avıatsııa ındýstrııasy jahandyq oıynshy bolýyna negiz bolady. Kelisim aıasynda aldaǵy 12 aı ishinde Ulybrıtanııanyń Azamattyq avıatsııa agenttiginiń (UK CAA) retteý jónindegi sarapshylary Qazaqstannyń avıatsııalyq ákimshiligine (QAÁ) qoldaý kórsetedi jáne Qazaqstandaǵy zańnamany taldap, EASA/EO erejelerin odan ári engizý jáne olardy UK CAA modelimen kelisý joldaryn usynady. Ekinshi jumys kezeńi Qazaqstannyń avıatsııalyq ákimshiliginiń uıymdyq qurylymyna arnalyp, onda UK CAA úlgisine sáıkes usynymdar beriledi. Halyqaralyq azamattyq avıatsııa agenttigine (CAAi) QAÁ tehnıkalyq personalyn oqytý qajettilikterine taldaý júrgizý tapsyrylǵan.
«Biz qazaqstandyq áriptesterimizben yntymaqtastyq qarym-qatynas ornatqanymyzǵa qýanyshtymyz jáne biz QAÁ -ti qoldaýǵa nıettimiz. Qazaqstan áýe kóligi sektoryn únemi jetildirýge zor talpynyspen qaraıdy jáne osy jolda biz úshin jetekshi ról atqarý óte mańyzdy. Geografııalyq jaǵynan Qazaqstan eki alyp avıatsııalyq naryq ortasynda ornalasqan, sondyqtan tranzıttik qosylystardyń kóp sanyn tartý, sondaı-aq onyń halyqaralyq jelisin keńeıtý úshin úlken áleýeti bar. Muny qadaǵalaý úshin Qazaqstannyń normatıvtik-quqyqtyq bazasy jetildire túsip, bul Qazaqstanǵa avıatsııadan keletin áleýmettik-ekonomıkalyq tıimdilikti arttyrýǵa múmkindik beredi», - dedi CAAi Halyqaralyq damý bóliminiń basshysy Mattııs Smıt.
Qazaqstan Respýblıkasy Indýstrııa jáne ınfraqurylymdyq damý mınıstri Beıbit Atamqulovtyń aıtýynsha, osy uıymnyń negizgi qyzmeti avıakompanııalar men áýe kemelerin tehnıkalyq baqylaý jáne qadaǵalaý, IKAO standarttaryna sáıkes personaldy oqytý bolyp tabylady.
«Endi Qazaqstanǵa ushý qaýipsizdiginiń eýropalyq standarttaryn engizýge Brıtandyq agenttiktiń jetekshi eýropalyq sarapshylary tehnıkalyq qoldaý kórsetedi», - dep atap ótti Beıbit Atamqulov.
Qazaqstannyń avıatsııalyq ákimshiliginiń bas dırektory Pıter Grıffıts: «Bul kelisim Qazaqstannyń avıatsııalyq ákimshiligi qyzmetkerleriniń biliktiligi men quzyrettiligin arttyrýǵa, sondaı-aq Ulybrıtanııanyń avıatsııalyq bıliginiń úzdik tájirıbesin alýǵa múmkindik beredi. Avıatsııalyq ákimshilikti qurý Qazaqstannyń avıatsııa salasyn memlekettik retteýdiń halyqaralaq úzdik tájirıbesine kóshýin jyldamdatady. Qazaqstannyń avıatsııalyq ákimshiligi áýe ushýlarynyń qaýipsizdigi sııaqty mańyzdy salada baqylaý men qadaǵalaýdy qamtamasyz etetin bolady. UK CAA-men kelisim IKAO talaptaryna sáıkes kelýge múmkindik beretin ushý qaýipsizdiginiń 80 paıyzdyq deńgeıine qol jetkizýdi maqsat etken Qazaqstannyń avıatsııalyq ákimshiligin qoldaýǵa baǵyttalǵan», - deıdi.
Ulybrıtanııa jáne Soltústik Irlandııa Birikken Koroldiginiń Qazaqstandaǵy elshisi Maıkl Gıfford pen onyń Halyqaralyq saýda departamentindegi (DIT) áriptesteri osy jobanyń júzege asýy úshin turaqty túrde qoldaý kórsetti.
«Ulybrıtanııa kóptegen salalarda eń ozyq tájirıbe kózi bolyp tabylady. Qazaqstannyń azamattyq avıatsııany retteýdiń brıtandyq úlgisin qabyldaýy, úkimettik qurylymdardyń bizdiń saraptamalyq bilim men ekonomıkalyq reformalardy qoldaýymyzǵa júginetindigin kórsetedi. Brıtandyq úkimet Qazaqstanmen qarym-qatynasymyzdy nyǵaıtýǵa baǵyttalǵan ustanymyn kórsetip otyr. Biz Qazaqstannyń áýe kóligi sektorynyń ósýine yqpal etetin jáne Qazaqstannyń avıatsııa ındýstrııasynyń jahandyq oıynshy bolýyna negiz bolatyn jańa bastamanyń iske qosylýyna maqtanyshpen kýá bolyp otyrmyz», - dep atap ótti DIT dırektory Edmýnd Marler.
Jobanyń alǵashqy kezeńi 2019 jyldyń qazan aıynda bastalady. Ekinshi kezeńde besjyldyq strategııalyq jospar jáne ekonomıkalyq turaqtylyqty qamtamasyz etetin jospar ázirlenedi.