Ulybrıtanııadan Túrkııaǵa 76 qutqarýshy men arnaıy qural-jabdyq jetkizildi
«Ulybrıtanııa Túrkııaǵa jedel kómek, onyń ishinde 76 izdeý-qutqarý mamany, arnaıy qural-jabdyqtar men qutqarýshy ıtterdi jóneltti», - dedi eldiń syrtqy ister mınıstri Djeıms Kleverlı.
Kómek Gazıantep áýejaıyna dúısenbi kúni keshke jetti. Mınıstrdiń aıtýynsha, London zilzala saldaryn joıýǵa kómek kórsetýdi jalǵastyrýǵa daıyn.
Brıtandyq izdeý-qutqarý tobynda arnaıy qurylǵylar, sonyń ishinde akýstıkalyq jabdyqtar, betondy kesýge jáne syndyrýǵa arnalǵan, sondaı-aq tireıtin jáne nyǵaıtatyn quraldar bar. Buǵan qosa, Ulybrıtanııa qarjylandyratyn «Aq kaskalar» úkimettik emes uıymynyń músheleri Sırııanyń soltústik-batysyna jumyldyryldy. Brıtandyq úkimet Sırııa Arab respýblıkasynda zardap shekkenderge shuǵyl gýmanıtarlyq kómek kórsetý máselesi boıynsha BUU-men baılanys ustap otyr.
Aıta ketsek, Túrkııanyń ońtústik-shyǵysyndaǵy Gazıantep provıntsııasynda 6,4-6,6 magnıtýdaly, keıin 7,4 magnıtýdaly qýatty jer silkinisi boldy.
Qazaqstan Tótenshe jaǵdaılar mınıstrliginiń qutqarýshylary jer silkinisi saldaryn joıýǵa kómek kórsetý úshin Almatydan Túrkııaǵa attandy. Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qyzmettik ıtter bar.
Qazaqstandyq qutqarýshylar mingen ushaq Túrkııanyń Gazıantep qalasyna qondy.
Qazaqstan Túrkııanyń zardap shekken aýdandaryna jiberý úshin dárigerler brıgadasyn quryp, daıyn otyr. Bul týraly QR Densaýlyq saqtaý mınıstri Ajar Ǵınııat málim etti.
Foto: facebook.com/AnadoluAgencyRussia
