Ulybrıtanııadan kelgen Reseı azamatynan koronavırýstyń «brıtandyq» shtamy anyqtaldy

MÁSKEÝ. TASS – QazAqparat – Ulybrıtanııadan oralǵan reseılik azamattan koronavırýstyń «brıtandyq» shtamy anyqtaldy. Bul týraly Rospotrebnadzor basshysy Anna Popova «Rossııa-1» telearnasynyń efırinde málim etti, dep habarlaıdy QazAqparat TASS agenttigine silteme jasap.

«Bir adamda koronavırýstyń jańa shtamy anyqtaldy», - dedi ol Ulybrıtanııadan oralǵan RF azamattaryn tekserý nátıjelerine pikir bildire otyryp.

Onyń aıtýynsha, koronavırýstyń «brıtandyq» shtammy Reseıde alǵash ret byltyrǵy jyldyń sońynda tirkelgen, ol adam qazir qaýipti emes.

«Biz byltyrǵy jyldyń sońynda qazirgi ýaqytta úreı týdyryp otyrǵan Ulybrıtanııadaǵy sol shtamnyń nusqasy elimizde bar ekenin anyqtadyq, tek bir adamda. Onyń jaǵdaıy jaqsy bolatyn jáne qazir de jaqsy. Azamatta aýrýdyń esh belgisi bolǵan joq. Ol qazirgi ýaqytta vırýsty taratpaıdy», - dedi ol.

Popova atap ótkendeı, vırýs burynǵydan qaýiptirek bola túsken joq. Alaıda onyń juqpalylyǵy artqan.

Eske sala ketsek, ótken jyldyń qarashasynan bastap eki el arasyndaǵy áýe qatynasy toqtaǵanǵa deıin Reseıge Ulybrıtanııadan 7 myńnan asa adam ushyp kelgen. Onyń 32-sinen koronavırýs anyqtaldy.

14 jeltoqsanda Ulybrıtanııanyń Densaýlyq saqtaý mınıstrliginiń basshysy Mett Henkok brıtandyq ǵalymdar koronavırýstyń mýtatsııaǵa ushyraǵan jańa túrin anyqtaǵanyn jáne ol Anglııanyń ońtústik-shyǵysyndaǵy aýrýdyń tez taralýyna qatysy bar bolýy múmkin ekenin habarlady. Onyń aıtýynsha, aldyn ala taldaý vırýstyń bul túri belgili shtamdardan da tez taraıtynyn kórsetken.