Ulybrıtanııadaǵy onlaın baıqaýda atyraýlyq jas ustaz úzdikter qatarynan kórindi
ATYRAÝ. QazAqparat –Atyraý oblysynyń Qurmanǵazy aýdanynda turatyn jas ustaz Uldana Naýryzǵalıeva Brıtandyq keńes uıymdastyrǵan bastaýysh jáne orta synyp oqýshylaryna arnalǵan «Aǵylshyn tilinen úzdik vıdeo sabaq» onlaın baıqaýyna qatysyp, úzdik 30 muǵalimniń qataryna endi, dep habarlaıdy QazAqparat.
Uldan Naýryzǵalıeva Abylaı han atyndaǵy qazaq halyqaralyq qatynastar jáne álem tilderi ýnıversıtetin bitirgen. Eńbek jolyn úsh jyl buryn bastaǵan. Qazir Qurmanǵazy aýdanynda ornalasqan Abaı atyndaǵy orta mektepte aǵylshyn tili páninen dáris beredi. Ol Ulybrıtanııadaǵy Ýorık ýnıversıtetiniń qoldanbaly lıngvıstıka ortalyǵynyń dırektory Pennı Mosavıannyń kirispe vebınarlaryna qatysqan.
«Bul vebınarlar muǵalimderge vıdeo sabaq jasaýdyń túrli qaǵıdasyn, ádisteri men quraldaryn meńgerýge kómektesedi. Odan keıin mektep oqýshylary úshin aǵylshyn tiliniń leksıkasy nemese grammatıkasy týraly vıdeo sabaq ázirleý boıynsha tapsyrmalar berildi. Men jalpy bilim beretin mekteptiń 11- synybyna arnalǵan grammatıkalyq «Question tags» taqyrybyn tańdadym» -deıdi Uldana Naýryzǵalıeva.
Onyń aıtýynsha, bul baıqaý Brıtandyq keńestiń onlaın-resýrstaryn paıdalanyp, beıne sabaq toptamasyn jasaýǵa, oqýshylardy qashyqtan oqytýda qoldaýǵa negizdelgen. Ár vebınardyń ýaqytyn, uıymdastyrylýyn Brıtandyq keńestiń joba menedjeri Ardaq Bekturova qamtamasyz etken. Muǵalimderge arnalǵan ınnovatsııalyq jobada jeke jáne praktıkalyq jumystarda vıdeony jaqsartý úshin keńester berilgen. Keıin jobany júzege asyrýshylar usynǵan taqyryp aıasynda qaıtadan beıne sabaq túsirip, baǵalaýǵa jiberedi eken.
Brıtandyq keńestiń onlaın-baıqaýyna qazaqstandyq 200 ustaz qatysqan. Al atyraýlyq jas ustaz Uldana Naýryzǵalıeva solardyń arasynan úzdik dep tanylǵan 30 muǵalimniń qataryna enip otyr.
