Ulybrıtanııadaǵy kolledjden qashyp ketken qyz Qazaqstanǵa qaıtarylady
ASTANA. 23 qańtar. QazAqparat - Ulybrıtanııadaǵy kolledjden qashyp ketken qazaqstandyq 17 jastaǵy Indıra Gaınıeva Qazaqstanǵa qaıtarylady, dep jazady The Daily Mail.
Qyzylordadaǵy dárihanalar jelisiniń ıesi, qyzdyń ákesi Ravıl Gaınıev: «Bári de jaqsy, qyzym tabyldy. Endi Indırany úıge, Qazaqstanǵa alyp ketkimiz keledi», - dedi. Eske sala keteıik, Qazaqstannyń týmasy 17 jastaǵy Indıra Gaınıeva men 16 jastaǵy Edvard Banıan Stonıherst kolledjinen 13 qańtar kúni qashyp ketip, Domınıkannan tabylǵan bolatyn. Jasóspirimder Pýnta-Kana kýrortyndaǵy bes juldyzdy qonaqúıge toqtaǵan. Ekeýi qashqan kúnnen bastap telefonǵa jaýap bermegen. Al bılet pen qonaqúıdiń qyzmetine ata-analarynyń esep-shotymen baılanysty nesıe kartochkalarymen tólegen. Atap óteıik, halyqaralyq izdeýde júrgen qyz ben jigit dál osy nesıe kartochkalarynyń arqasynda tabyldy. Ekeýi de úılerine qaıtarylǵansha jiti baqylaýda bolady. Qyzdyń da, jigittiń de ata-analary olarǵa qatty renjigenimen, balalarynyń aman-esen tabylǵandaryna qýanyshty.
