Ulybrıtanııadaǵy ınflıatsııa qazan aıynda 11,1%-ǵa deıin ósti

LONDON. QazAqparat – Qazan aıynda Ulybrıtanııadaǵy ınflıatsııa jyldyq esep boıynsha 11,1 paıyzǵa deıin ósti. Bul – 1981 jyldan bergi eń joǵary kórsetkish, dep habarlaıdy QazAqparat tilshisi.

Brıtandyq Ulttyq statıstıka qyzmetiniń esebinde aıtylǵandaı, baǵanyń qymbattaýynyń negizgi faktorlary elektr energııasy, gaz jáne basqa da otyn tarıfteriniń sondaı-aq azyq-túlik qunynyń ósýi bolyp otyr.

Osyǵan oraı, búkil el boıynsha ártúrli salalardaǵy kásipodaqtar, sonyń ishinde temirjolshylar, medıtsına qyzmetkerleri, JOO oqytýshylary, poshta qyzmetkerleri jalaqyny kóterýdi talap etip ereýilderge shyǵýda.

Sondaı-aq, eldegi ınflıatsııanyń jedeldeýinen bıznes qatty zardap shekti. Elektr energııasynyń qymbattaýynan brıtandyq barlar men meıramhanalar jumys ýaqytyn qysqartýǵa májbúr bolyp otyrǵanyn habarlaǵan bolatynbyz.