Ulybrıtanııadaǵy eń iri áýejaıdyń kúzetshileri 10 kúndik ereýilge shyqpaqshy

LONDON.QazAqparat - Ulybrıtanııanyń eń iri áýe aılaǵyndaǵy qaýipsizdik qyzmetkerleriniń ereýiline baılanysty Hıtroý áýejaıyna kelip, ketetin reısteri keshigip, jolaýshylar iri kezekterge tap bolady, dep habarlaıdy QazAqparat tilshisi.

Unite kásipodaǵynyń múshesi bolyp tabylatyn 1400-den astam Hıtroý kúzetshileri 31 naýryzdan bastap 10 kúnge sozylatyn ereýilge daýys berdi. Ereýil mektep demalysynyń bastapqy kezeńin qamtıdy jáne Pasha jeksenbisinde, 9 sáýirde aıaqtalady.

«Hıtroý áýejaıynyń qyzmetkerleri tómen jalaqy alady, al bas dırektor men top-menedjerlerdiń jalaqysy joǵary. Kompanııa jetistiginiń negizi - áýejaı qyzmetkerleri. Olarǵa jalaqy ádil berilýi tıis», - dedi Unite kásipodaǵynyń Bas hatshysy Sheron Grem.

«Bizdiń kásipodaq músheleri Hıtroýda tólenetin jalaqynyń tómendiginen kúnkóristerin óteı almaıdy. Olar muqtajdyqtan ereýilge shyǵýǵa májbúr», - dep qosty ol.

Ereýilge tek British Airways paıdalanatyn áýejaıdyń besinshi termınalynda jumys isteıtin kúzetshiler jáne Hıtroýǵa keletin barlyq júkterdi tekserýge jaýapty qyzmetkerler qatysady.

Áýe aılaǵy ákimshiliginiń málimdemesinde áýejaı ereýilge qaramastan ashyq bolatyny jáne jumys isteı beretini aıtylǵan. Ortasha eseppen Hıtroý kúnine 128 myńnan astam adamǵa nemese 214 baǵyt boıynsha kún saıyn 536 reıske qyzmet kórsetedi.