Ulybrıtanııadaǵy ataqty Tesco sýpermarketi násilshildigi úshin aıyptaldy
ASTANA. 10 shilde. QazAqparat - 22 jasar Hollı Bekett aýrýhanada jatqan dosynyń qyzyna arnap qýyrshaq satyp alý úshin Tesco sýpermarketine barady.
Dúken sóresinen ol aqshyl jáne qara óńdi birdeı qýyrshaqtardy kóredi. Aqshyl óńdi qýyrshaq óziniń qara óńdi kóshirmesinen qymbatyraq turady eken. Bul týraly Eýrazııa birinshi arnasy jazady.
The Sun habarlaǵandaı, My Lovely Baby dep atalǵan aqshyl qýyrshaq 5,96 fýnt, al qara tústi My Beautiful Baby-diń baǵasy 4,97 fýntty qurap, birinshisinen bir fýntqa arzan turady. Oıynshyqtardyń qaptamalaryndaǵy sýretterde qýyrshaqtarmen oınap otyrǵan qyzdardyń sýreti beınelengen. Aqshyl óńdi qýyrshaqpen eýropalyq qyz, al qara tústi qýyrshaqpen qara terili qyz oınap otyr eken. Qýyrshaqtardyń attary, tústeri, kıimderi de ártúrli, sondaı-aq shyǵaratyn dybystary da eki túrli. Klıent násilshildikke jol berilgenine ashýlanyp, sýpermarket qyzmetkerine shaǵym bildiredi. Áıel adamdy bul jaı ǵana ketken qatelik dep sendirip, baǵany túzetip qoıýǵa ýáde beredi. Alaıda satyp alýshy bir aptadan keıin kelip, qýyrshaqtardyń baǵalarynyń áli de ózgermegenin baıqaıdy.
Aıta keteıik, Hollı Tesco sýpermarketiniń burynǵy qyzmetkeri eken. Ol kompanııanyń abyroıyn oılaǵanyn, kompanııanyń násilshildikke jol bergeni úshin jaýapkershilikke tartylǵanyn qalamaıtynyn aıtty. Kompanııa spıkeri qazirgi tańda qýyrshaqtardyń birdeı baǵamen satylyp jatqanyn, al osyǵan deıingi baǵa aıyrmashylyǵyn aqshyl óńdi qýyrshaqtardyń dúken sórelerinde erterek paıda bolýymen túsindirdi.
