Ulybrıtanııada jańa týǵan 7 náresteni óltirgen medbıkege úkim shyqty

ASTANA. QazAqparat – Manchester soty jańa týǵan jeti náresteni óltirgen medbıke Lıýsı Letbıdi keshirim nemese merziminen buryn bosatý quqyǵynsyz ómir boıyna bas bostandyǵynan aıyrý jazasyna kesti, dep habarlaıdy QazAqparat VVS-ge silteme jasap.

Bul – brıtan zań júıesindegi eń qatal úkim.

Lıýsı Letbı aǵylshyn quqyǵy tarıhynda ómir boıyna sottalǵan tórtinshi áıel boldy.

Chester grafınıasy aýrýhanasynda (Chester graftyǵyndaǵy ulttyq densaýlyq saqtaý qyzmetiniń negizgi aýrýhanasy) jumys istegen ol 2015 jyldyń maýsymy men 2016 jyldyń maýsymy aralyǵynda jańa týǵan nárestelerge bos shprıtspen aýa salyp óltirdi.

Ol sondaı-aq aram oıyn júzege asyrýǵa artyq tamaqtandyrý jáne ınsýlınmen ýlandyrý sııaqty ádisterdi qoldandy.

Letbıdiń áriptesteri onyń sábıler ólimine qatysy bar ekenin alǵashqy úsh oqıǵadan keıin kúdiktendi, sebebi barlyq oqıǵa onyń kezekshiligi kezinde bolǵan.

Alaıda aýrýhana ákimshiligi bastapqyda buǵan asa mán bermedi.

Sýdıa Lıýsı Letbı bir sábıdi óltirgen kezde tanytqan erekshe tsınızmge erekshe nazar aýdardy.

Ol dárigerler náreste ómiri úshin kúresip jatqanda birge bolyp, qutqarmaq túr tanytqan.

Sondaı-aq, sýdıa Letbıdiń jeti sábıdiń ólimi men densaýlyǵyna aýyr zııan keltirgen ár jaǵdaıǵa egjeı-tegjeıli toqtaldy.

Áıelge qatysty sot protsesinde onyń taǵy alty náresteniń ómirine qastandyq jasaǵany dáleldendi.

Letbı sot úkimin shyǵarý kezinde sot zalynda bolýdan bas tartty.

Ulybrıtanııada ómir boıyna bas bostandyǵynan aıyrý jazasy 1983 jyldan qoldanyla bastady.

20 jylǵa jýyq ýaqyt ishinde mundaı úkimdi tek ishki ister mınıstri shyǵarǵan, al 2002 jyly sheshim qabyldaý quqyǵy sýdıalarǵa berildi.

Ulybrıtanııada ómir boıy bas bostandyǵynan aıyrý jazasyna kesilgen alǵashqy áıel Maıra Hındlı boldy.

Ol 1990 jyly kisi óltirgeni úshin sottalyp, 2022 jyly túrmede qaıtys boldy.