Ulybrıtanııada jańa geosaıası jaǵdaıdaǵy Qazaqstannyń ınvest rejımi talqylandy
Іs-sharanyń basty mindeti Ulybrıtanııanyń bıznes qaýymdastyǵyn elimizde neǵurlym qolaıly ınvestıtsııalyq ahýal qalyptastyrýyn nazar aýdara otyr keń aýqymdy saıası reformalar, jańa ekonomıkalyq saıasat sharalary men Jańa Qazaqstan qurylysynyń basymdyqtary týraly habardar etý boldy.
Konferentsııanyń ashylýynda QR Elshisi Erlan Ydyrysov jáne «Armstrong Teasdale» kompanııasynyń seriktesi Denıel O’Konnell sóz sóıledi.
Atap aıtqanda, qazaqstandyq dıplomat elimizdiń ınvestıtsııalyq tartymdylyǵynyń ósip kele jatqanyna toqtady. 2021 jyldyń qorytyndysy boıynsha otandyq ekonomıkaǵa tikeleı sheteldik ınvestıtsııalar aǵynynyń 37 paıyzǵa ósýi buǵan dálel.
Sonymen qatar, E. Ydyrysov Qazaqstandaǵy ekonomıkalyq jańǵyrý barysy, elimizdiń ınvestıtsııalyq strategııasy jáne Qazaqstan men Ulybrıtanııanyń ınvestıtsııalyq-ekonomıkalyq yntymaqtastyǵynyń jańa perspektıvalary týraly habardar etti.
Onyń pikirinshe, Ulybrıtanııadan Qazaqstanǵa jańa kapıtal salymynyń ósýine jalpy aǵylshyn quqyǵy negizinde jumys isteıtin «Astana» halyqaralyq qarjy ortalyǵy (AHQO) qyzmeti jáne negizinen belgili aǵylshyn sýdıalarynan turatyn tórelik ınstıtýttardyń belsendi qyzmeti eleýli serpin beredi.
AHQO Investıtsııalar jónindegi dırektory Djeıms Martın konferentsııa barysynda qańtar oqıǵalarynan keıin jáne Ýkraınada jalǵasyp jatqan qaqtyǵys aıasynda Qazaqstanǵa ınvestıtsııa salýdyń jańa perspektıvalary týraly málimdedi. Onyń pikirinshe, óńirdegi aıqyn týrbýlenttik úderister «Qazaqstannyń jetistikterin joıýǵa ákelgen joq, kerisinshe, buryn josparlanǵan sharalardy jedeldetti». Ol elimizdiń ınvestıtsııalyq jáne ekonomıkalyq turaqtylyqtyń «araly» ekenin atap ótti, buǵan bıznestiń Qazaqstanǵa shektes elderden jappaı kóshýi dálel.
Dj. Martın Qazaqstannyń ınvestıtsııalyq qurylymynda áleýetti jáne jumys istep turǵan ınvestorlar úshin bıznesti súıemeldeý boıynsha joǵary sapaly qyzmetterdi usynatyn AHQO-na erekshe oryn beriletinin atap ótti.
Sondaı-aq konferentsııaǵa Eýrazııadaǵy energetıka jáne tabıǵı resýrstar boıynsha Eýropalyq qaıta qurý jáne damý bankiniń dırektory Aıda Sıtdıkova, «MUFG Bank» bankiniń atqarýshy dırektory jáne Ortalyq Azııa boıynsha basshysy Aıman Muqanova, «Armstrong Teasdale» seriktesi Rashıd Gaısın jáne «Kazakh Invest» UK» AQ Investıtsııalar tartý jáne marketıng departamenti dırektorynyń orynbasary Ásel Sýanqulova qatysty.
«Kazakh Invest» ulttyq kompanııasynyń ókili Qazaqstandaǵy sheteldik bıznestiń ınvestıtsııalyq qyzmetiniń jandanǵanyna toqtap, qazaqstandyq bılik eldegi bıznes-ahýaldy odan ári jaqsartý úshin qoldan kelgenniń bárin jasap jatqanyn atap ótti.
A. Sýanqulovanyń aqparaty boıynsha, Qazaqstanda ekonomıkanyń ınvestıtsııalyq tartymdylyǵyn arttyrýdyń jáne «ortalyq – óńirler – elshilikter» ósi boıynsha sheteldik kompanııalardyń qazaqstandyq naryqqa kirýine járdemdesýdiń úsh deńgeıli júıesi is júzinde óziniń tıimdiligin dáleldedi.
Sonymen qatar, «Kazakh Invest» ókili Qazaqstannyń ınvestıtsııalyq portfolıosyndaǵy jańa «jasyl» tehnologııalardyń erekshe róli týraly aıtyp berdi. Onyń pikirinshe, bul bizdiń memleketimizdi óz ekonomıkalaryn dekarbonızatsııalaýdy júrgizetin elderdiń aldyńǵy qataryna shyǵarady.
A. Sıtdıkova óz baıandamasyn qazaqstandyq ekonomıkanyń básekege qabilettiligin arttyrýdyń qajetti sharty retinde energetıkalyq kóshýge jáne dekarbonızatsııa taqyrybyna arnady.
Onyń paıymdaýynsha, jaqyn arada halyqaralyq ınvestıtsııalyq tartymdylyq júıesinde «jasyl» ekonomıkany damytý tikeleı sheteldik ınvestıtsııalardyń negizgi kózine aınalady. Sondyqtan Qazaqstannyń kómirtegi mólsheri joǵary energııa kózderinen kezeń-kezeńimen bas tartýy bolashaqqa baǵdarlanǵan oń ınvestıtsııalyq ımıdjdiń kepili bolyp tabylady.
Konferentsııanyń moderatory «Fintech Ireland» jáne «Fintech UK» kompanııalarynyń negizin qalaýshy, sondaı-aq «Armstrong Teasdale» keńesshisi Pıter Oýks boldy.
