Ulybrıtanııada zańsyz mıgranttarǵa qarsy zań kúsheıtiledi
ASTANA. QazAqparat - Ulybrıtanııada zańsyz kóshi-qondy boldyrmaýǵa baǵyttalǵan zań jobasy qyzý talqylanyp jatyr. Aldaǵy ýaqytta shekarany ruqsatsyz kesip ótkendermen aıaýsyz kúres júrgizilip, qatań sharalar qoldanylmaq. Quqyq qorǵaýshylardyń pikirinshe, bılik partııasynyń bul bastamasy etıkalyq nomalarǵa qaıshy. Saıasatkerlerdiń paıymdaýynsha, jańa zań qabyldanǵan jaǵdaıda Ulybrıtanııa Adam quqyqtary jónindegi Eýropalyq konventsııadan shyǵýy kerek, dep habarlaıdy QazAqparat tilshisi.
Jańa zań jobasyna sáıkes Ulybrıtanııa aýmaǵyna zańsyz kirgen mıgranttar qamaýǵa alynyp, dereý elderine qaıtarylmaq. Týǵan jerinde onyń ómirine qaýip tóngen jaǵdaıda basqa qaýipsiz memleketke jiberiledi. Olar, tipti, baspana suraý quqyǵynan da aıyrylady. Elden alastatylǵannan keıin ǵana bul múmkindikke qol jetkizýi yqtımal. Tek kámeletke jasy tolmaǵandar, naýqastar jáne ómirine qaýip tóngen adamdar ǵana bul shekteýden bosatylady.
«Sońǵy jyldary gýmanıtarlyq kómek retinde Ulybrıtanııaǵa 500 000-ǵa jýyq adamnyń kirýine jaǵdaı jasadyq. Bul bizdiń jomarttyǵymyz ben janashyrlyǵymyzdyń aıqyn kórinisi. Biz shynymen de muqtaj adamdarǵa dostyq qolyn sozýdy jalǵastyramyz. Biraq kóshi-qon erejelerin jáne baspana berý júıesin buzýǵa jol bermeımiz», - deıdi Ulybrıtanııanyń Іshki ister mınıstri Sýella Braverman.
Zańsyz mıgranttar Tumandy Albıonǵa Eýropadan, ıaǵnı qaýipsiz aýmaqtan keledi. Brıtan bıliginiń pikirinshe, bosqyndar baspanany sol elderden suraýlary kerek. Biraq onyń ornyna, zańdardyń jumsaqtyǵyn paıdalanyp, Ulybrıtanııaǵa zańsyz qonys aýdarýǵa asyǵady. La-Mansh buǵazyn úrlemeli qaıyqpen kesip ótip, sýǵa aǵyp ketkenderi qanshama? Mıgranttar nópirin toqtatý úshin London baryn salyp jatyr. Sońǵy sharalardyń biri – 3 jyldyń ishinde Parıjge shamamen 500 mıllıon sterlıng fýntyn bólýdi josparlap otyr.
«Biz Frantsııanyń soltústiginde jańa qamaý ortalyǵyn ashamyz. Ol quqyq qorǵaý organdarynyń basyn bir jerde biriktirmek. Frantsýz jaǵajaılaryn kúzetetin qosymsha 500 polıtseıdi de jumysqa tartpaqshymyz. Olardyń barlyǵy zańsyz mıgranttardy ustaýǵa kómektesetin ushqyshsyz drondarmen jáne basqa da baqylaý tehnologııalarymen qamtamasyz etiledi», - deıdi Ulybrıtanııa premer-mınıstri Rıshı Sýnak.
Zań jobasy parlamentarııler nazaryna resmı túrde usynylmaı turyp, quqyq qorǵaýshylar men oppozıtsııadaǵylardyń qatań synyna ushyrady. Óıtkeni ol etıkalyq normalarǵa, Ulybrıtanııa qol qoıǵan adam quqyqtary jónindegi Eýropalyq Konventsııaǵa jáne BUU-nyń bosqyn mártebesi týraly Konventsııaǵa qaıshy.
«Bul - múldem qate qadam. Bıliktegiler ótken jyly da osyǵan uqsas bastama kóterdi. Biz onyń jumys istemeıtinin aıttyq. Zań qabyldandy, biraq zańsyz mıgranttar sany kemimedi. Olar bosqyndardy Rýandaǵa kóshirý úshin 140 mıllıon jumsady, alaıda aqsha dalaǵa shashyldy», deıdi oppozıtsııalyq Leıborıster partııasynyń kóshbasshysy Kır Starmer.
Resmı málimetterge sáıkes, 2022 jyly Frantsııadan Ulybrıtanııaǵa shaǵyn qaıyqtarmen 45 myńǵa jýyq adam júzip ótken – bul bir jyl burynǵy ýaqytpen salystyrǵanda 60 protsentke kóp, al 2018 jyly bul kórsetkish nebári 300 adamdy quraǵan. Baspana suraýshylardyń basym bóligi 40 jasqa tolmaǵan, tepse temir úzetin jigitter. Kópshiligi qaýipsiz sanalatyn Albanııa elinen. Olarǵa salyq tóleýshilerdiń esebinen qonaq úı beriledi, járdemaqy tólenedi.
