Ulybrıtanııada veıp saýdasy qatań baqylanady

LONDON. QazAqparat - Ulybrıtanııada elektrondyq temekiler týraly zańnyń osal tustaryn saýdagerler paıdalanyp jatyr. Olar óskeleń urpaqqa veıptiń tegin úlgilerin usynyp, balalardy táýeldi etýde. Nátıjesinde jastar men jasóspirimder arasynda elektrondy shylymqumarlardyń qatary kúrt artty. Endi jergilikti bılik býyny bekı qoımaǵandarǵa baǵyttalǵan veıp-marketıngke qarsy ymyrasyz kúres jarııalap otyr, deıdi QazAqparat tilshisi.

Sońǵy jyldary elektrondyq temeki satatyn dúkender ortalyq kóshelerde qaptap ketti. Men-mundalap turǵan mańdaıshalary men jarq-jurq etken jarnamalary kózdiń jaýyn alady. Veıptiń tátti dámi men túrli-tústi qaptamalaryna qarap, balalarǵa arnalyp shyǵarylǵan ba dep qalasyń. Úkimet qolyn mezgilinen kesh sermeýden qoryqqandaı. Olar zańdy oraǵytyp ótýge ilik tapqan pysyqaılardyń jolyn kespekshi. Premer-mınıstr Rıshı Sýnak olardyń zańsyz saýdasymen aınalysatyn dúkenderge aıyppul kólemin ósirýdi josparlap otyr.

«Sońǵy eki jyl kóleminde balalar arasynda veıpqumarlar sanynyń kúrt ósýine alańdaýlymyn. Meniń eki kishkentaı qyzym bar. Osy máselege jiti nazar aýdarýymyz kerek dep oılaımyn. Búgin laborotorııada júrip, veıpterdiń keıbiri eresekterge emes balalarǵa arnap shyǵarylǵanyn baıqadyq. Óıtkeni dámi, qospalary, jarnamalaý joldary jas jetkinshekterdi tartý úshin jasalǵan», deıdi Ulybrıtanııa Premer-mınıstri Rıshı Sýnak.

Jańa ózgeristerge sáıkes 18 jasqa tolmaǵandarǵa nıkotınsiz veıpter satýǵa tyıym salynbaq jáne mektepterdegi polıtsııa qyzmetkerleriniń sany kóbeıtilmek.

Manchesterdegi dúkenderdiń birinde kámelet jasqa tolmaǵandardyń qujattary jiti tekseriledi. Saýda ornynyń egesi salalyq saýda uıymynyń tóraǵasy. Ol úkimettiń jańa bastamasyn qos qoldap qoldaıdy.

«Biz bul salada 14 jyldan astam ýaqyttan beri jumys isteımiz. Bıliktiń bul baǵyttaǵy qadamdaryn quptaımyz. Sońǵy 2 jyl bederinde bir ret paıdalanatyn veıpterdiń saýdasymen buryn-sońdy aınalyspaǵan dúkender kóbeıip ketti», deıdi dúken ıesi Markýs Sakston.

Ulybrıtanııa Qoǵamdyq densaýlyq saqtaý uıymy shylymqumarlyqtan arylǵysy keletin eresekterdi veıp paıdalanýǵa úgittep keledi. Jaqynda olardyń usynysyn úkimet qoldaı bastady. Jańa bastamaǵa sáıkes, árbir besinshi shylym shegýshige elektrondyq temeki tegin usynylady. Veıp - qaýipti, biraq oǵan tyıym salýǵa bolmaıdy deıdi mamandar.

«Bir ret paıdalanylatyn veıpter eresekter úshin kerek. Ásirese, temekini qoıǵysy kelip júrgenderge onyń kóp kómegi bar. Biraq eshqashan shylym shegip kórmegen balalar men jastarǵa veıpterdi qoljetimsiz etip tastaý kerek», deıdi Shyǵys Anglııa ýnıversıtetiniń professory Keıtlın Notlı.

Ulttyq densaýlyq saqtaý qyzmetiniń sońǵy málimetterine sáıkes 11 men 15 jas aralyǵyndaǵy jasóspirimderdiń 9 protsenti elektrondyq temeki tartatynyn moıyndaǵan. Oppozııalyq partııalar jaǵdaı kúrdelenbeı turǵanda ózgeristerdi shuǵyl engizý kerektigin aıtady.