Ulybrıtanııada ulttyq ónerimiz pash etildi
Kembrıdj ýnıversıtetiniń Fıtsýılıam murajaıynda «Uly dala altyny» kórmesi ashylǵany belgili.
Oǵan Shyǵys Qazaqstan oblysyndaǵy ejelgi saq qorǵandarynan tabylǵan altyn artefaktiler qoıylǵan.
Qazaqstan Táýelsizdiginiń 30 jyldyǵy qurmetine uıymdastyrylǵan sharaǵa otandyq ónerpazdar da óz úlesin qosty.
Aǵylshyn rytsarlarynyń dýlyǵasy men músinderine arnalǵan murajaı galereıalary bir keshke qazaq óneriniń ordasyna aınaldy.
Qazaqstandyq shyǵarmashylyq ókilderi barshaǵa tanys hıt ánder men ulttyq folklordan shashý shashty.
Eýropalyq kórermenniń kóńilin birden baýrap alý úshin aldymen olarǵa tanys, júregine jaqyn áýenderdi qara dombyranyń únimen qazaqı naqyshta jetkizýge tyrysty.
«Tyńdarmanǵa ózimizdiń kaver-nusqalarymyzdy usyndyq. Ol álemdik hıt ánderden, onyń ishinde brıtandyq ánshilerdiń hıt ánderinen jáne de árıne, ózimizdiń qazaq ánderin, Shámshi Qaldaıaqovtyń, Qurmanǵazy atamyzdyń kúılerinen usyndyq», - deıdi Made in KZ tobynyń jetekshisi Baýyrjan Itekeev.
«Biz ándi jandy daýysta, 100 paıyz jandy daýysta oryndaımyz. Óıtkeni biz janymyzben, tánimizben sapaly mýzykaǵa basymdyq beremiz», dedi Made in KZ tobynyń ánshisi Nazym Itekeeva.
Made in KZ tobynyń taǵy bir múshesi Jandos Ákimbaevtyń aıtýynsha, ónerpazdar dombyranyń únin búkil álemge tanymal etkisi keledi jáne Made in KZ tobyn brendke aınaldyrǵysy bar.
Ónerpazdardyń kontserti ertesine ashyq aspan astynda jalǵasty. Murajaı janynan ótip bara jatqan Kembrıdj qalasynyń turǵyndary kidirip, ásem án men tátti kúılerdi súısine tyńdady. Aıaldamaǵa toqtaǵan eki qabatty avtobýstardyń jolaýshylary bolsyn, kóshe tazalap júrgen jumysshylar bolsyn qos ishekti mýzykalyq aspappen jaqynyraq tanysqysy keldi. Uıaly telefondaryna túsirip, yrǵaqty mýzykaǵa qosyla bılegender de tabyldy.
«Shyǵarmashylyq aldynda bas ıetin, óner dese ishken asyn jerge qoıatyn jergilikti turǵyndar kelip, dombyraǵa qyzyǵýshylyq tanytyp jatyr. Ol degenimiz qazaq jurtynyń armandarynyń biri oryndaldy dep oılaımyn. Qazaqtyń qasıetti qara dombyrasy búkil álemdi jaýlasa ol bizdiń maqsatymyzdyń oryndalǵany», - deıdi kúıshi-kompozıtor, Shyǵys Qazaqstan oblystyq fılarmonııasynyń dırektory Aıbek Bekbosyn.
«Men búgin kórmege kirgim keldi. Biraq halyq óte kóp bolǵandyqtan kirý múmkin bolmady. Onyń ornyna sizderdiń mýzykalaryńyzdy tyńdaý qurmetine ıe boldym jáne shynymen de rahat sezimge bólendim. Bul ulttyq dybysty estı otyryp, jańa ǵana ınternetke jedel kirdim jáne onyń aty dombyra ekenin bildim. Qazir aspapty qolyma ustap otyryp, onyń ǵajap ekenine kózim jetip otyr», dep tyńdarmandardyń biri, zeınetker Nıkola Harrıson qýanyshyn jasyrmady.
Qazaqtyń tól ónerine tánti bolǵan aǵylshyndar Qazaqstanǵa baryp, Uly dala órkenıetin óz kózimen kórgisi keletinderin aıtyp jatty. Ónerpazdardan shaǵyn sheberlik sabaǵyn alyp, dombyra tartýdy úırendi.
