Ulybrıtanııada Rojdestvo qarsańynda karantın kúsheıtildi

LONDON. QazAqparat – Ulybrıtanııanyń premer-mınıstri Borıs Djonson Londonda jáne eldiń ózge de óńirlerinde koronavırýspen kúres boıynsha sharalarynyń kúsheıtilgenin jarııa etti, dep habarlaıdy QazAqparat menshikti tilshisi.

Brıtan úkimetiniń basshysy osy aptada anyqtalǵan jyldam tarap bara jatqan COVID-19 vırýsynyń jańa mýtatsııasyna bıliktiń alańdaýly ekenin atap ótti.

Londonnyń barlyq bóligi men Anglııanyń ońtústigi men shyǵysyndaǵy kóptegen aýdan endi epıdemıologııalyq jaǵdaıdyń jańa «tórtinshi deńgeıine» enedi.

20 jeltoqsannan bastap Ulybrıtanııanyń atalǵan aýdandarynyń turǵyndary úshin Rojdestvony qosa áleýmettik baılanysqa shekteý qoıylady. Azyq-túliktik emes taýarlar satatyn, jabyq mádenı mekemelerdiń, sulýlyq salondarynyń jáne basqa da mekemelerdiń jumysy toqtatylady.

«Biz Rojdestvony buryn josparlaǵandaı toılaı almaımyz. Anglııada «tórtinshi deńgeı» aýmaǵynda turatyndar Rojdestvoda otbasynan basqa adamdarmen qatynasqa túspeýi tıis», - dedi B.Djonson baspasóz máslıhatynda.

«Men bul kóptegen adamdardyń kóńilin qaldyratynyn bilemin, biraq pandemııa kezinde biz ǵylymdy basshylyqqa alýymyz kerek jáne solaı etemiz dep aıttyq. Medıtsınalyq derekter ózgergen kezde biz qorǵanys sharalaryn qoldanýymyz qajet», - dep túsindirdi ol.

Ulybrıtanııada koronavırýs juqtyrýdyń ortasha aptalyq deńgeıi eki aptada 66 paıyzǵa ósti, al Londonda sońǵy aptada eki ese ósti.

Sonymen qatar, 31 jeltoqsanda Jańa jyl qarsańynda karantındik shekteýlerdi jeńildetý josparlanbaǵan.