Ulybrıtanııada fýnt-sterlıng baǵamy quldyraı bastady
BRıÝSSELЬ. QazAqparat - Ulybrıtanııada «Breksıt» kelisiminiń jobasy boıynsha kereǵar pikirdegi úkimet ókilderiniń otstavkaǵa ketýi fýnt-sterlıng baǵamynyń kúrt tómendeýine ákep soqtyrdy, dep habarlaıdy QazAqparattyń menshikti tilshisi.
Osy aptada London men Brıýssel Ulybrıtanııanyń EO quramynan shyǵý sharttary boıynsha ymyraǵa kelgen bolatyn. Eldiń Eýropa odaǵynan shyǵý máseleleri jónindegi mınıstri Domınık Raab «Breksıt» sharttary boıynsha kereǵar pikirde bolǵandyqtan, otstavkaǵa ketetinin málimdedi.
«Búgin men «Breksıt» máseleleri jónindegi mınıstr laýazymynan otstavkaǵa ketýge ótinish jazdym. EO quramynan shyǵý jónindegi kelisimniń sharttaryn qoldaýǵa meniń ar-uıatym jol bermeıdi», - dep jazdy D. Raab beısenbiniń tańynda Twitter paraqshasynda.
Ol budan tys, otstavkaǵa ketý sebepterin túsindirip, premer-mınıstr Tereza Meıge joldaǵan hatyn da jurtshylyq nazaryna usyndy.
«Óz tarapymnan, mámileni eki sebep boıynsha qoldaı almaımyn. Birinshiden, Soltústik Irlandııa úshin usynylǵan retteý rejımi Birikken Koroldiktiń birtutastyǵyna aıtarlyqtaı qaýip tóndiredi», - dedi D. Raab.
Al ekinshi sebep retinde D. Raab Eýroodaqqa Ulybrıtanııanyń odaq quramynan shyǵý sheshimine veto quqyǵynyń berilýine tóze almaıtynyn atap kórsetti.
Odan basqa, Brıtanııanyń Soltústik Irlandııa isteri jónindegi mınıstrliginiń memlekettik hatshysy Shaılesh Vara da eldiń EO quramynan shyǵý sharttary týraly kelisim jobasyna kelise almaı, beısenbi kúni otstavkaǵa ketý týraly ótinish jazǵan edi.
Sonyń saldarynan Brıtan valıýtasynyń basqa kóptegen negizgi valıýtalarmen salystyrǵandaǵy baǵamy tómendedi. Fýnt AQSh dollaryna qatysty 1,1%, eýroǵa qatysty 1,25% qunsyzdandy.
Sársenbi kúni keshkisin Ulybrıtanııa úkimeti eldiń EO quramynan shyǵý sharttary týraly kelisimniń jobasyn maquldady. Tereza Meıdiń aıtýynsha, bul - Brıýsselmen kelisýge bolatyn eń jaqsy joba.
25 qarasha kúni Ulybrıtanııanyń Eýropa odaǵynan shyǵý sharttary týraly kelisim jónindegi jumystyń aıaqtalýyna arnalǵan kezekten tys sammıt ótedi.
