Ulybrıtanııada Ál-Farabı atyndaǵy QazUÝ túlekteri qaýymdastyǵynyń bólimshesi ashyldy
; ALMATY. Aqpannyń 11-i. QazAqparat /Erbol Azanbek/ - Ulybrıtanııa astanasy Londonda Ál-Farabı atyndaǵy QazUÝ-dyń túlekteri qaýymdastyǵynyń bólimshesi ashyldy,
dep habarlaıdy QazAqparatQazUÝ-dyń baspasóz qyzmetine silteme jasap.
Bólimsheniń ashylýyna Londonǵa is-saparmen barǵan QazUÝ-dyń rektory Baqytjan Jumaǵulov pen Ulybrıtanııada bilim alyp, jumys istep júrgen qazaqstandyq stýdentter men túlekterdiń kezdesýi sebep bolǵan. Kezdesýde stýdentterdiń turmystyq jaǵdaıy men bilim alýyna qatysty máseleler men bıylǵy Qazaqstannyń EQYU-ǵa tóraǵalyq etýi talqylandy. QazUÝ rektory kópshilik nazaryna Qazaqstan Respýblıkasynyń Prezıdenti Nursultan Ábishuly Nazarbaevtyń Qazaqstan halqyna jasaǵan Joldaýynan úzindi keltirip, qujattyń strategııalyq mańyzdylyǵyn túsindirdi. Sonymen qatar kezdesýde Ulybrıtanııada bilim alyp jatqan 4 myń qazaqstandyq stýdent Londonda QazUÝ Túlekter qaýymdastyǵynyń bólimshesin ashýdy usynǵan.
Ýnıversıtet rektory da óz kezeginde jastardyń bul usynysyn qoldaǵan. Bólimsheniń tóraǵasy bolyp Qazaqstan Respýblıkasynyń Ulybrıtanııa men Soltústik Irlandııadaǵy Tótenshe jáne Ókiletti elshisi Qaırat Ábýseıitov saılandy. Qaırat Qýatuly QazUÝ-dyń túlegi, kezinde tarıh fakýltetin támamdap, talaı jyldar boıy qarashańyraqta qyzmet etken.
Esterińizge sala keteıik, Ál-Farabı atyndaǵy Qazaq ulttyq ýnıversıtetiniń Túlekter qaýymdastyǵy 2009 jyly qurylǵan. Onda qaýymdastyqtyń tóraǵasy bolyp QR Bas prokýrory Qaırat Mámı saılanǵan edi. Odan beri QazUÝ túlekteriniń qaýymdastyǵynyń bólimsheleri Qazaqstannyń ár oblysynda jáne Máskeýde ashylǵan bolatyn. Jaqynda Germanııa memleketinde de ashylady dep kútilýde. Búginde QazUÝ túlekteriniń sany 125 myń adamdy quraıdy.
