Ulybrıtanııada 100 myńǵa jýyq memqyzmetshi ereýilge shyqpaq
LONDON. QazAqparat – Ulybrıtanııanyń 100 myńǵa jýyq memlekettik qyzmetshisi 1 aqpanǵa josparlanǵan ereýilge qatysady, dep habarlaıdy QazAqparat tilshisi.
«Memlekettik jáne kommertsııalyq qyzmetter odaǵynyń Ulttyq atqarý komıteti (Public and Commercial Services Union, PCS) 1 aqpanda uıymnyń barlyq múshesi úshin birkúndik ereýil jarııalaýǵa kelisimin berdi. Byltyr daýys berý kezinde ereýil ótkizý úshin uıymnyń 50% astam múshesi daýys bergen edi», - delingen Ulybrıtanııa memlekettik qyzmetshileriniń múddesin qorǵaıtyn kásipodaq habarlamasynda.
Bul brıtandyq memlekettik qyzmetshilerdiń sońǵy jyldarǵy eń iri boı kórsetýi bolmaq. Oǵan eldiń túkpir-túkpirindegi 124 memlekettik organnyń qyzmetshileri, sonyń ishinde mınıstrler kabıneti, ishki ister, kólik, bilim, densaýlyq saqtaý jáne áleýmettik qorǵaý mınıstrlikteriniń qyzmetkerleri qatysady.
Aıta keteıik, qazir Ulybrıtanııada temirjolshylar, avtobýs júrgizýshileri, medbıkeler men jedel járdem qyzmetkerleri jalaqyny arttyrýdy jáne eńbek jaǵdaıyn jaqsartýdy talap etip, aýqymdy narazylyq aktsııasyn ótkizýde.
Foto: REUTERS/Toby Melville
