Ulybrıtanııa tórt kúndik jumys aptasyna óte bastady
NUR-SULTAN. QazAqparat – Osy aptadan bastap Ulybrıtanııada myńdaǵan jumysshy tórt kúndik jumys aptasyna ótý boıynsha tájirıbe bastady, dep habarlaıdy QazAqparat BBC-ge silteme jasap.
Alty aıǵa sozylatyn jáne tarıhtaǵy eń úlken eksperımentke 70-ke jýyq kompanııa qatysyp jatyr. Ony eńbek aqysyn joǵaltpaı qysqartylǵan jumys aptasyn jaqtaıtyn bastamashyl top uıymdastyrdy.
Eksperımentke qatysýshylar jumsalǵan ýaqyttyń 80% úshin jalaqysynyń 100% alady, biraq olardan eńbek ónimdiliginiń artýy talap etiledi. Eksperımentti Oksford pen Kembrıdjdiń brıtandyq ǵalymdary jáne olardyń Bostondaǵy amerıkalyq áriptesteri Autonomy analıtıkalyq kompanııasymen birlese otyryp basqarady.
Eksperımentke qatysýǵa baǵdarlamalyq jasaqtama jasaýshylar men jumyspen qamtý keńselerinen bastap qaıyrymdylyq uıymdary men jergilikti fısh-end-chıps tamaqtaný oryndary sııaqty kóptegen kompanııalar jazyldy.
3 myńǵa jýyq adam tartylǵan brıtandyq eksperıment - bul jahandyq bastamanyń bir bóligi ǵana. Osyǵan uqsas tájirıbeler Irlandııa, AQSh, Kanada, Aýstralııa jáne Jańa Zelandııada ótkizilip jatyr.
«Qatań kópjyldyq jumys tártibin ustanýdyń esh máni joq. Kóptegen jaǵdaıda siz 100% ónimdilik berýińiz múmkin. Muny osyny qoldanyp jatqan kompanııalardyń tájirıbesi rastaı alady», - deıdi «Jahandyq tórt kúndik jumys aptasy» jobasynyń jetekshi zertteýshisi, Boston kolledjiniń ekonomıst, áleýmettanýshysy Djýlet Shor.
Zertteýshi mundaı rejımniń bárine jáne ár mamandyqqa saı kelmeıtinin aıtty.
