Ulybrıtanııa sońǵy on jyldaǵy eń aýyr tumaý maýsymyn bastan ótkerip jatyr

LONDON. QazAqparat – Ulybrıtanııada keıingi on jylda tirkelgen eń kúrdeli tumaý maýsymy ótip jatyr. Bul týraly eldiń Densaýlyq saqtaý jáne áleýmettik qamtamasyz etý máseleleri boıynsha memlekettik hatshysy Stıv Barklaı málimdedi, dep habarlaıdy QazAqparattyń menshikti tilshisi.

«Tumaý bıylǵy maýsymdy erekshe qıyndatty. Keıingi jyldarda bolmaǵan tumaý maýsymyna tap boldyq. Byltyr osy ýaqytta tumaýmen aýrýhanaǵa túskender sany 50 adam bolsa, bıyl 5100-den asady. Tumaý erte ári tez bastalyp, qarashadan jeltoqsanǵa deıin jeti ese kóbeıdi», - dep atap ótti Stıv Barklaı brıtan parlamentinde sóılegen kezinde.

Onyń aıtýynsha, tumaý epıdemııasy koronavırýs pen A topty skarlatına, streptokokk syndy basqa da ınfektsııalarymen qatar júrip jatyr.

«Tumaý máselesi kovıdtiń ornyn basty. 9 myńnan asa adam koronavırýs juqtyryp, aýrýhanada jatyr. Al A tobyndaǵy skarlatına men streptokokktyń kóbeıýi shuǵyl járdem qyzmetine qosymsha kúsh túsirdi», - dep atap ótti brıtandyq Densaýlyq saqtaý mınıstrliginiń basshysy.

Bul jaǵdaıdy eńbekaqyny kóterip, eńbek jaǵdaıyn jaqsartýdy talap etken medıtsına qyzmetkerleriniń ereýilderi tipti qıyndatyp jiberdi.

Stıv Barklaıdyń medıtsına qyzmetkerleriniń múddesin qorǵaıtyn kásipodaq ókilderimen kelissózi dúısenbi kúni sátsiz boldy.

Endi Anglııa men Ýels jedel járdem qyzmetkerleri 11 jáne 23 qańtar kúnderi, al olardyń Soltústik Irlandııadaǵy áriptesteri 26 qańtarda ereýilge shyǵady.

Al Anglııada medbıkeler 18-19 qańtarda pıket uıymdastyrady. Shotlandııalyq medıkter de jaqyn arada ereýil kúnin belgileıdi.

Foto: AP