Ulybrıtanııa patshaıymynyń kúıeýi aýrýhanadan shyqty
NUR-SULTAN. QazAqparat – II Elızaveta patshaıymnyń 99 jastaǵy jubaıy Fılıpp hanzada Londondaǵy aýrýhanada tórt apta jatyp shyqty, dep habarlaıdy QazAqparat VVS-ge silteme jasap.
Ol 16 aqpanda London ortalyǵyndaǵy VII Edýard aýrýhanasyna jatqyzylǵan bolatyn. Onyń syrqaty jaıly tolyq aqparat aıtylmady.
Keıinirek ol Londonnyń basqa aýrýhanasynda – Áýlıe Varfolemeıde kardıologııalyq protsedýradan ótti, sodan keıin ol VII Edýard emhanasyna oraldy. Jalpy alǵanda, gertsog aýrýhanada 28 kún emdeldi.
Býkıngem saraıy patshaıymnyń kúıeýiniń syrqaty koronavırýspen baılanysty emes ekenin habarlady.
Eske sala keteıik, 18 aqpanda Ulybrıtanııa patshaıymy II Elızavetanyń 99 jastaǵy jubaıy Edınbýrg gertsogy Fılıpp hanzada jaǵdaıy nasharlap, London aýrýhanasyna jiberilgen bolatyn.
