Ulybrıtanııa Patshaıymy Brexit týraly zańǵa qol qoıdy
LONDON. QazAqparat - Ulybrıtanııa Patshaıymy Elızaveta II Eýropalyq odaqtan eldiń shyǵýy týraly parlament qabyldaǵan zańǵa qol qoıdy, sol arqyly Brexit 31 qańtarda júzege asatyny málim boldy, dep habarlaıdy QazAqparat BBC-ge silteme jasap.
Brıtan úkimetiniń EO-dan shyǵý isi jónindegi mınıstri Stıven Barklı Twitter-degi paraqshasynda zańnyń kúshine engenin jarııalady.
«Keshe Qaýymdar palatasy men Lordtar palatasy Brexit týraly zańdy tolyq maquldady. Búgin Patshaıym zańǵa qol qoıdy, zań kúshine endi. Bul atalmysh qujattyń zańǵa aınalǵanyn bildiredi. Ári 31 qańtarda EO-dan bizdiń shyǵatynymyzdy rastaıdy», - dedi Stıven Barklı vıdeoúndeýinde.
«Osy syzyqty biz eshqashan attap óte almaıtyn sekildi boldyq, alaıda biz ony iske asyrdyq», - dep málimdedi zańnyń kúshine enýine qatysty sóılegen eldiń premeri Borıs Djonson.
Patshaıymnyń zańnamaǵa qol qoıýy resmı rásim bolyp sanalady. Óıtkeni monarh parlament maquldaǵan barlyq zańǵa qol qoıýy tıis.
Byltyr jeltoqsan aıynda parlament maquldaǵan premer Borıs Djonsonnyń josparyna sáıkes, Brıtanııa 31 qańtarda keshki saǵat 11-de Eýroodaqtan resmı túrde shyǵady.
Eýroparlament 31 qańtarda Brıtanııanyń shyǵýy týraly másele boıynsha daýys beredi. Eýrodepýtattar Brıtanııa parlamenti qabyldaǵan EO-dan shyǵý jónindegi mámileni maquldaýy kútilip otyr.
Brıtanııanyń 2016 jyly jazda ótkizgen Eýroodaqtan shyǵý týraly referendýmy ońaıǵa soqpady.
Brexit máselesi eldi ekige bóldi, eki konservatıvti úkimet (Devıd Kemeron men Tereza Meı) otstavkaǵa ketti jáne eki márte parlament saılaýy (2017, 2019 jyldary) ótkizildi.
