Ulybrıtanııa Parlamentinde ondaı komıssııa joq – QR SІM Janbolat Mamaı isi boıynsha kelgen top jaıly

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov Janbolat Mamaı isi boıynsha Qazaqstanǵa kelgen «Brıtandyq parlament» týraly pikir bildirdi, dep habarlaıdy QazAqparat tilshisi.

«Biz Janbolat Mamaıdyń isin tergeý boıynsha Qazaqstanǵa «brıtandyq parlamenttik komıssııa» dep atalatyndardyń kelgenin estidik. Aıta keteıik, Ulybrıtanııa Parlamentinde qurylǵan bundaı resmı komıssııa joq. Brıtandyq taraptyń aqparatyna sáıkes, bul komıssııa eldiń parlamenti nemese úkimetiniń múddesin bildirmeıdi. Qazaqstannyń anonımdi azamattary tobynyń tapsyrysy boıynsha «Bındmanns» jeke zań kompanııasy júrgizetin óz tergeýi bar. Tergeýge, bedelge ıe bolý úshin, bul kompanııa brıtan parlamentiniń úsh múshesin tartty. Olardyń qandaı sharttarmen kelgeni týraly aqparatty olardan ózinen bilýge bolatyn shyǵar. Bulardyń qandaı kompanııa ekenin jáne ne isteıtinin, ınternetten ózińiz kóre alasyz, barlyq aqparat bar», - dedi Aıbek Smadııarov.

SІM resmı ókili atalǵan komıssııany resmı róli joq uıym retinde sıpattady.

«Nelikten parlamentshiler ózderin kúmándi shyqqan aqsha úshin jalǵan, táýelsiz komıssııalarmen baılanystyratynyn túsinbeımiz. Bul komıssııanyń resmı róli joq.

Áıtpese, ózińiz qarańyz: ulttyq parlament belgili bir komıssııa qurady, egemendi memleketke keledi, tergeý júrgizedi. Bul memleketter arasyndaǵy qatynastardyń halyqaralyq-quqyqtyq normalaryna sáıkes kele me? Jaýaby anyq», - dedi ol.