Ulybrıtanııa parlamenti Qazaqstandaǵy Májilis saılaýyna baıqaýshy jiberýdi josparlap otyr
Ulybrıtanııa parlamentinde Qazaqstanmen yntymaqtastyq jónindegi Jalpypartııalyq parlamenttik top parlamentaralyq dıalogty damytý maqsatynda 2015 jyldyń kúzinde qurylǵan.
Top ókilderiniń quzyretine syrtqy saıasat, qorǵanys, barlaý jáne qaýipsizdik, qarý-jaraq eksportyn baqylaý, ekonomıka, saýda, ǵylym jáne bilim berý máseleleri kiredi.
«Biz Qazaqstan sııaqty ortaq erejelerge negizdelgen dúnıetanymy ortaq jáne demokratııa men erkindikti ilgeriletýdi qalaıtyn eldermen baılanys ornatqymyz keledi», - dedi D.Kavchınskı QazAqparat tilshisine.
«Men úshin Astanada ótetin saılaýǵa baqylaýshysy retinde kelýge shaqyrý alý - úlken mártebe. Men úshin saılaý ýchaskelerindegi naqty jaǵdaıdy kórý, daýys berýge kelgen qazaqstandyqtarmen áńgimelesý óte qyzyq», - dedi brıtandyq depýtat.
«Qazaqstannyń Ulybrıtanııada bedeli joǵary. Bizdiń elderimizdiń birlesken ózara tıimdi is-áreketteri úshin zor múmkindikteri bar», - dep atap ótti Brıtan parlamenti tómengi palatasynyń depýtaty.
«Saılaýdyń qalaı ótip jatqanyn, sóz bostandyǵynyń jaǵdaıyn, barlyq saıası partııalarǵa saılaýdyń teń dárejede bolýy úshin buqaralyq aqparat quraldaryndaǵy teń efır ýaqytyn alý úshin qandaı múmkindikter berilgenin túsiný úshin úkimettik emes uıymdarmen jáne saraptama ortalyqtarymen pikir almasqym keledi. Bul kez kelgen saılaýdyń qanshalyqty ashyq jáne qanshalyqty erkin ótetinin baǵalaý kezinde óte mańyzdy», - dedi spıker.
Sonymen birge, saılaý úderisteri týraly aıta kele, brıtandyq parlamentarıı demokratııany qurýdyń tamasha úlgilerin izdemeýge shaqyrdy, óıtkeni barlyq elderdiń óz kemshilikteri bar.
«Bizde problemalar joq dep oılamańyz. Biz jaqynda ǵana saılaý zańnamasyna ózgerister engizdik. Endi saılaý ýchaskesinde jeke basyn kýálandyratyn qujatty kórsetý mindetti bolyp tabylady», - dedi D. Kavchınskı.
2023 jylǵa deıin Ulybrıtanııadaǵy saılaýǵa (Soltústik Irlandııadan basqa) qatysý úshin eshqandaı qujat kórsetý qajet etilmegen. Saılaýshylar poshta arqyly nemese saılaý ýchaskelerine kelip, tek aty-jónin, meken-jaıyn aıtyp daýys berdi. Ózgeristerdiń maqsaty - brıtandyq saılaýda burmalaýǵa jol bermeý.
«Daýys berý júıesiniń ádil bolýy úshin bárimiz úırenip, ózgerýdemiz. Bul - óte mańyzdy, óıtkeni biz kelise alatyn bir nárse bar, ol – halyqtyń daýys berý júıesi olardyń tilekteriniń shynaıy kórinisi ekenine senimi», - dep atap ótti spıker.
D.Kavchınskı Ulybrıtanııanyń Syrtqy ister mınıstri tarapynan Qazaqstandaǵy saıası jáne áleýmettik-ekonomıkalyq reformalardy qoldaıtynyn atap ótip, Májilistiń bolashaq quramymen baılanystar tereńdetilip, keńeıtiletinine úmit bildirdi.
«Bizdiń parlament pen Qazaqstan parlamenti arasynda ekijaqty baılanys ornatý kerek. Ol úshin men Vestmınster Demokratııa qoryn, sondaı-aq basqa da kóptegen brıtandyq taldaý ortalyqtary men ınstıtýttaryn paıdalanǵym keledi», - dedi ol.
Aıta keteıik, Vestmınster Demokratııa qorynyń seriktesteri qataryna álemniń 30-dan astam elinde mańyzdy saıası jáne ákimshilik mindetterdi sheshetin parlamentter, saıası partııalar, saılaý organdary jáne azamattyq qoǵam uıymdary kiredi.
