Ulybrıtanııa Nazarbaev Zııatkerlik mektepteriniń oqý baǵdarlamasyn moıyndady
ASTANA. QazAqparat - Nazarbaev Zııatkerlik mektepteriniń (NZM) NIS-Programme oqý baǵdarlamasy halyqaralyq GCE A-Level biliktilik talabyna saı bolyp tanyldy, dep habarlaıdy QazAqparat tilshisi NZM-nyń baspasóz qyzmetine silteme jasap.
Ulybrıtanııanyń bilim kýáligin taný jónindegi ulttyq aqparat ortalyǵynyń (UK NARIC - National Recognition Information Centre) sarapshylary Nazarbaev Zııatkerlik mektepteriniń NIS-Programme oqý baǵdarlamasy jan-jaqty zerdelep qana qoımaı, zııatkerlik mektepterdi aralap kórdi. Sonyń nátıjesinde «Nazarbaev Zııatkerlik mektepteriniń 12 synypty támamdaý týraly attestaty Ulybrıtanııanyń GCE A-Level deńgeıimen sáıkes keledi» degen sheshimge keldi. GCE A-Level baǵdarlamasy álemniń barlyq úzdik ýnıversıtetterinde moıyndalǵan. Bul baǵdarlama boıynsha bilim alǵan túlekter eshqandaı qosymsha emtıhan tapsyrmastan jáne ýnıversıtetke daıyndaıtyn Foundation kýrsyn oqymastan joǵary oqý ornyna túse alady.
Nazarbaev zııatkerlik mektepteriniń oqý baǵdarlamasyn qazaqstandyq joǵary oqý oryndary da moıyndaǵan. Qazirgi tańda Zııatkerlik mektepterdiń túlekteri Qazaqstan-Brıtan tehnıkalyq ýnıversıtetine (QBTU), KIMEP Ýnıversıteti, Q. Sátbaev atyndaǵy Qazaq ulttyq tehnıkalyq ýnıversıtetine (QazUTÝ), Almaty menedjment ýnıversıtetine (AlmaU), Almaty energetıka jáne baılanys ýnıversıteti (AEBÝ), Q. Jubanov atyndaǵy Aqtóbe óńirlik memlekettik ýnıversıteti (AÓMÝ), Halyq sharýashylyǵy ýnıversıtetine («Bıznesti ákimshilendirý bakalavri» mamandyǵyna), Halyqaralyq aqparattyq tehnologııalar ýnıversıtetine («Aqparattyq qaýipsizdik» mamandyǵyna) ekinshi kýrsqa túse alady. Budan bólek, NZM túlekteri Nazarbaev Ýnıversıtetiniń bakalavrıat baǵdarlamasyna ýnıversıtetke daıyndaıtyn Foundation kýrsyn oqymastan qabyldanady.
Foto: nis.edu.kz
