Ulybrıtanııa mınıstri Parıj stadıonyndaǵy tártipsizdikti tergeýdi surady
NUR-SULTAN. QazAqparat - Ulybrıtanııanyń Mádenıet mınıstri Nadın Dorrıs Eýropalyq fýtbol qaýymdastyqtary odaǵyn (UEFA) Parıjde ótken Chempıondar lıgasyndaǵy tártipsizdik pen fınaldyń keshigý sebepterin resmı túrde tekserýge shaqyrdy, dep habarlaıdy QazAqparat BBC silteme jasap.
Frantsýz polıtsııasy «Real Madrıd – Lıverpýl» matchyndaǵy aǵylshyn jankúıerlerine kózden jas aǵyzatyn gaz ben burysh spreıin qoldanǵany úshin synǵa ushyrady.
Frantsııanyń ishki ister mınıstri Jerald Darmanen kináni brıtandyq fýtbol jankúıerlerine artyp, myńdaǵan adamnyń tıisti bıleti joq bola tura Stad de Frans stadıonyna kúshpen kirgenin atap ótti. Polıtsııa 105 adamdy ustady. Óz kezeginde UEFA ókilderi matchtyń keshigýin «qaýipsizdik maqsatynda» dep túsindirdi.
Eske salsaq, Senbi kúni Chempıondar lıgasynyń fınaly kezinde jáne odan keıin Parıj polıtsııasy Frantsııa astanasynyń Sen-Denı mańyndaǵy «Stad de Frans» stadıonynda bolǵan tártipsizdik kezinde 68 adamdy qamaýǵa aldy.
ÝEFA men Frantsııa bıliginiń málimetinshe, Chempıondar lıgasynyń fınaly aldyndaǵy beıbereketsizdikke matchty kórgisi kelgen myńdaǵan adamnyń qolyndaǵy jalǵan bıletter sebep bolǵan. Stadıonǵa kireberistegi jankúıerlerdiń kóptiginen Chempıondar lıgasynyń fınaly otyz mınýttan astam ýaqytqa keshiktirilgen.
