Ulybrıtanııa Qazaqstanǵa 3 mlrd dollar nesıe bermek
ASTANA. QazAqparat - Ulybrıtanııa Qazaqstanǵa 3 mlrd dollar jeńildetilgen nesıe berýge daıyn. Bul týraly búgin ótken brıfıngte QR Syrtqy ister mınıstrligi baspasóz qyzmetiniń jetekshisi Aıbek Smadııarov aıtty, dep habarlaıdy QazAqparat tilshisi.
Onyń aıtýynsha, 17-18 qyrkúıek aralyǵynda Ulybrıtanııanyń Eksporttyq qarjylandyrý agenttiginiń tóraǵasy Lýı Teılordyń Astanaǵa jumys sapary bolady. Onyń barysynda birqatar qazaqstandyq mınıstrlikter men ulttyq kompanııalardyń basshylarymen kezdesýler josparlanǵan. Ulybrıtanııanyń Eksporttyq qarjylandyrý agenttigi eksport, merdigerlik jáne qyzmet kórsetý boıynsha operatsııalardy qarjylandyrý men nesıeleýdiń biryńǵaı operatory bolyp tabylady jáne Ulybrıtanııanyń Qazynashylyǵyna esep beredi.
«Qazaqstannyń Ulybrıtanııadaǵy Elshiliginiń derekteri boıynsha, qazirgi tańda, UKEF tarapynan elimizdiń Aýyl sharýashylyǵy mınıstrligi kelisimshartynyń paıdasyna qarjylyq qoldaý kórsetý jóninde kelissózder júrgizilýde», - dedi SІM ókili.
Aıbek Smadııarovtyń aıtýynsha, brıtandyq ınjınırıngtik kompanııa Worley Parsons Qazaqstannyń aýyldyq aımaqtaryn sýmen jabdyqtaý jobasynyń tehnıkalyq-ekonomıkalyq negizdemesin ázirlep jatyr.
«Jalpy, brıtandyq taraptyń derekteri boıynsha, UKEF qazaqstandyq ınfraqurylymdyq jobalarǵa 2 mıllıardtan 3 mıllıard AQSh dollaryna deıin jeńildik negizde nesıelik qarjylandyrýdy qamtamasyz etýge daıyn»,- dedi ol.
