Ulybrıtanııa karantın sharalaryn úsh aptaǵa uzartty
NUR-SULTAN. QazAqparat - Ulybrıtanııa koronavırýsqa qatysty engizilgen karantın sharalaryn úsh aptaǵa uzartty, dep habarlaıdy QazAqparat Memlekettik komıssııanyń shuǵyl shtabyna silteme jasap.
Brıtanııada 26 naýryzda jarııalanǵan karantın rejımi mamyr aıynyń basyna deıin uzartylady. Degenmen, el Úkimeti shekteý sharalaryn toqtatý týraly túpkilikti sheshimdi vırýstyń taralý qaýpi joqtyǵyna kóz jetkizgennen keıin ǵana qabyldamaq. Jaqynda brıtan aýrýhanalarynda pandemııanyń saldarynan 861 adam kóz jumdy. Ólim-jitimniń jalpy sany 13 729-ǵa jetti.
Buǵan deıin habarlaǵanymyzdaı, 17 sáýir saǵat 09.00-degi jaǵdaı boıynsha, Ulybrıtanııada naýqastardyń jalpy sany 103 093 boldy. 323 adam indetten aıyqty. Álemde koronavırýsqa 2,2 mıllıonǵa jýyq adam shaldyqty.
Aıta keteıik, 10 sáýirden beri birneshe memleket pandemııaǵa qatysty engizilgen shekteýlerdi jumsartý ne sozý boıynsha sheshimder qabyldady.
Máselen, Italııa úkimeti koronavırýstyń taralýyn shekteý úshin qabyldanǵan sharalardy 3 mamyrǵa deıin uzartatyny málim etildi.
Túrkııa 31 provıntsııada 48 saǵatqa komendanttyq saǵat engizdi.
13 sáýir kúni Ispanııa úkimeti 27 naýryzda engizilgen keı shekteýlerdi alyp tastady.
Al Frantsııa kerisinshe, koronavırýsqa baılanysty engizilgen qatań rejımdi 11 mamyrǵa deıin uzartty.
Kúni keshe ǵana Japonııa pandemııaǵa baılanysty el boıynsha tótenshe jaǵdaı rejımin engizetini jarııalandy.
Germanııa bıligi bolsa, 20 sáýirden bastap áleýmettik qashyqtyqtyń barlyq sharalaryn saqtaı otyryp, keıbir mekemelerdiń jumysyn qaıta jandandyrmaq.
