Ulybrıtanııa Eýroodaqtan shyqqan jaǵdaıda jylyna £100 mlrd joǵaltady
ASTANA. QazAqparat - Eger Ulybrıtanııa qazirgi kelisimder negizinde Eýropa odaǵynan shyǵatyn bolsa, 2030 jylǵa deıin JІÓ kólemi 4% qysqaryp, el ekonomıkasy jyl saıyn 100 mlrd fýnt sterlıngten qaǵylýy múmkin. Bul týraly Ulttyq ekonomıka jáne áleýmettik zertteýler ınstıtýtyna silteme jasap, The Independent gazeti habarlady.
Instıtýt qyzmetkerleriniń esepteýinshe, bul eldiń árbir turǵynynyń jyl saıynǵy tabysynyń 1090 fýn sterlıngke qysqaratynyn bildiredi.
«Bizdiń negizgi qorytyndylarymyz, eger Brexit jónindegi qazirgi kelisim boıynsha, Ulybrıtanııa EO ortaq naryǵy men keden odaǵynan 2021 jyly shyǵatyndaı bolsa, 2030 jylǵa qaraı eldiń jalpy ishki ónimi, odaq quramynda qalǵan kúnindegimen salystyrǵanda 4% qysqarady», - deıdi sarapshylar.
Mamandardyń aıtýynsha, buǵan qyzmet kórsetý salasyndaǵy kedergiler sebep bolady. Kedergiler ekonomıkanyń osy sektoryn tartymsyz etip, Eýropa odaǵynan keletin ınvestıtsııalar kóleminiń jáne brıtan jumysshylarynyń tıimdiliginiń qysqarýyna ákep soqtyrady.
