Ulybrıtanııa Assandjdy Shvetsııaǵa berse, hakerler brıtan úkimetiniń saıtyn buzýǵa ýáde berip otyr
ASTANA. 10 jeltoqsan. QazAqparat - Hakerler Londonǵa úzildi-kesildi talap qoıyp otyr. Eger Djýlıan Assandj Shvetsııaǵa ustap beriletin bolsa, hakerler Ulybrıtanııa úkimetiniń veb-saıtyn buzýǵa ýáde berýde. «Enonımes» hakerler toby búgin osyndaı qoqan-loqy jasady, dep habarlaıdy «Maıak» radıosy.
Esterińizge sala keteıik, ótken táýlikte hakerler WikiLeaks-pen jumys isteýden bas tartqan PayPal elektrondyq tólem júıesiniń ınternet-resýrstaryna shabýyl jasady. Birneshe saǵatqa sozylǵan kıbershabýyldyń saldarynan adamdar ınternet arqyly tólem jasaı almaı, biraz ábirjidi.
Al onyń aldynda hakerler MasterCard tólem júıesine shabýyl jasady. Munyń aldynda iri halyqaralyq MasterCard tólem júıesi jobanyń negizin qalaýshy Djýlıan Assandjǵa qatysty tergeý bastalýymen baılanysty WikiLeaks ınternet-jobasynyń esepshotyna qarjy aýdarýdy toqtatqan bolatyn. MasterCard ókilderiniń málimdemeleri boıynsha, operatsııalardy júzege asyrý WikiLeaks qyzmetin tergeý tolyq aıaqtalyp, jaǵdaı anyqtalǵansha toqtatylǵan. Sondaı-aq Visa jetekshi tólem júıesi de osyndaı sheshim qabyldaǵan.
Esterińizge sala keteıik, myńdaǵan qupııa qujattardy jarııalaǵan WikiLeaks saıtynyń ıesi Djýlıan Assandj Ulybrıtanııada júrgen sapary kezinde, adam zorlady degen shved ókimetiniń aıyptaýy boıynsha qamaýǵa alynǵan bolatyn. Assandjdy kepilaqshamen bostandyqqa shyǵarýǵa da ruqsat berilmeı otyr.
