Ulybrıtanııa 12 jylda Qazaqstanǵa 12,1 mlrd dollar ınvestıtsııa quıǵan
ASTANA. QazAqparat - Búgin Qazaqstan Respýblıkasy Investıtsııalar jáne damý mınıstri Jeńis Qasymbek Ulybrıtanııa Birikken Koroldigi men Soltústik Irlandııanyń Saýda jáne ınvestıtsııalar mınıstri Greg Hendspen kezdesti, dep habarlaıdy mınıstrliktiń baspasóz qyzmeti.
Kezdesý barysynda alda ótetin saýda-ekonomıkalyq, ǵylymı-tehnıkalyq, mádenı yntymaqtastyq jónindegi Qazaqstan-brıtan úkimetaralyq komıssııasynyń 4 otyrysy týraly, sondaı-aq Qazaqstan men Ulybrıtanııa arasyndaǵy ınvestıtsııa, taý-ken, aýyl sharýalyshyǵy sııaqty perspektıvaly baǵyttar boıynsha seriktestik ornatý jaıyn talqylady.
«Men eki el arasyndaǵy qarym-qatynastyń jyl saıyn nyǵaıyp kele jatqandyǵyn erekshe atap ótkim keledi. Ulybrıtanııa - bizdiń Eýropadaǵy eń iri strategııalyq seriktesterimizdiń biri», dedi Jeńis Qasymbek.
Condaı-aq, kezdesý barysynda Qytaı-Qazaqstan-Ulybrıtanııa arasyn baılanystyratyn «Uly Jibek joly» ekonomıkalyq beldeýin júzege asyrýda birlesip jumys atqarý úshin úshjaqty kelisim ornatý máselesi de sóz boldy.
Búginde Qazaqstan terrıtorııasy arqyly Qytaı men Eýropanyń arasynda 15 tranzıttik konteınerlik poıyz júredi. Ótken jyly «Qytaı-Eýropa-Qytaı» baǵytyndaǵy tranzıttik konteınerler tasymaly 104,5 myńǵa jetip, 2015 jylmen salystyrǵanda eki esege artyp otyr (49,9 myń konteıner).
2017 jyly Chjetszıan (QHR) - London (Ulybrıtanııa) baǵyty boıynsha alǵashqy júk konteınerlik poıyzy iske qosyldy. Endigi rette bul baǵyt boıynsha júkti týra 18 kún ishinde jetkizetin múmkindik týdy. Bul júk kemesine qaraǵanda qyzmetin 30 kún erte oryndaıdy.
Búginde úkimetaralyq komıssııa aıasynda bilim jáne ǵylym, energetıka, taý-ken ónerkásibi baǵyttary boıynsha 4 jumys toby jumys isteıdi.
Ulybrıtanııa - taýar aınalymy boıynsha Qazaqstannyń eń iri 10 seriktesiniń qataryna kiredi, sondaı-aq, Qazaqstanǵa eń kóp ınvestıtsııa ákeletin úzdik alty eldiń qatarynda. Ulybrıtanııa sońǵy 12 jyl ishinde Qazaqstanǵa jalpy kólemi 12,1 mlrd. AQSh dollaryn quraıtyn tikeleı ınvestıtsııa ákeldi (2005 jyldan 2017 jyldyń birinshi toqsanyna deıingi kórsetkish boıynsha tikeleı ınvestıtsııa kólemi 12 278,2 mln. AQSh dollaryn quraıdy). Bul - Qazaqstanǵa tartylǵan jalpy sheteldik ınvestıtsııanyń 5%.
Anyqtama úshin: 2017 jyldyń qańtar-sáýir aılary boıynsha Qazaqstan men Ulybrıtanııa arasyndaǵy taýar aınalymy 422,6 mln. AQSh dollaryn qurady. Bul 2016 jyldyń dál osy kezeńimen salystyrǵanda 26,6%-ǵa joǵary (333,7 mln. AQSh dollary).
