«Uly jut hronıkasy» kitabynyń qazaq tilindegi barlyq taralymy el kitaphanalaryna syıǵa tartyldy
ASTANA. 27 qarasha. QazAqparat - QR Ulttyq kitaphanasynda Valerıı Mıhaılovtyń «Uly jut hronıkasy» kitabynyń qazaq tilindegi aýdarmasynyń tusaýkeseri ótti.
Kitapta 20 ǵasyrdyń 30-shy jyldaryndaǵy asharshylyq kezinde 2 mln. qazaqtyń jáne shamamen jary mıllıon basqa ult ókilderiniń qaza tabýy keńinen baıandalady. 10 myń dana taralymmen jaryq kórgen basylym elimizdiń barlyq kitaphanalaryna, ásirese birinshi kezekte mektepter men joǵary oqý oryndaryna tegin taratylady.
«Bul kitap qana emes, sonymen qatar orys qalamgeriniń azamat retindegi zor qadamy dep baǵalaýǵa bolady. Ol bizderdi biriktire túsýimen de erekshelenedi. Kitapta mızantron Goloşekınmen ǵana baılanysty oqıǵalar berilmegen. Onda Ǵabıt Músirepovtiń, Mekemtas Myrzahmetovtiń, Ǵalym Ahmetovtiń asharshylyq jaıly biregeı estelikteri berilgen», - dep atap ótken jazýshy Elýbaı Smaǵulov qazaq zııalylary atynan orys jazýshysy Valerıı Mıhalovqa zor alǵysyn bildirdi.
Aıta keteıik, «Ul jut hronıkasy» kitaby alǵash ret 1990 jyly orys tilinde jaryq kórgen bolatyn. Ony jýrnalıst Talǵat Aıtbaıuly aýdarǵan edi. Al jańa basylymnyń aýdarmasymen aqyn Ǵusman Jandybaev aınalysty.
