Uly Jibek jolymen jańa ekspedıtsııa jolǵa shyqty
ALMATY. Maýsymnyń 25-i. QazAqparat /Erbol Turymbetov/ - Búgin Almatydaǵy «Interfaks-Qazaqstan» aqparat agenttiginiń baspasóz ortalyǵynda «1000 jyldan keıingi Uly Jibek joly» jobasy ekspedıtsııasynyń birinshi kezeńin bastaýǵa arnalǵan baspasóz máslıhaty ótti,
dep habarlaıdy QazAqparat.
Sharany «Has Sanat» Mádenıetti damytý ulttyq qory» qoǵamdyq qory uıymdastyryp otyr. 46 adamnan turatyn toptyń ishinde mádenıet jáne óner qaıratkerleri, jýrnalıster, uıymdastyrý komıtetiniń televızııalyq túsirý toby men qyzmetkerleri bar. Resmı júrýdiń saltanatty rásimi búgin Astana qalasynyń eski alańynda, Abaı eskertkishiniń aldynda bastalyp ta ketti.
Aldyn-ala daıyndyq júrisine quramy 5 adamnan turatyn top jol talǵamaıtyn 2 kólikpen ekspedıtsııanyń negizgi kóshelerimen attanady. Birinshi kezeńde ekspedıtsııa músheleri Qazaqstan aýmaǵyndaǵy arheologııalyq eskertkishterdi sýretke túsirip, beıne taspaǵa jazý jumystaryn júrgizedi. Sonymen qatar, Qazaqstannyń sheteldegi dıplomatııalyq ókildikteri jáne Elshilik qyzmetkerlerimen tanysyp, qazaq dıasporalarymen kezdesý de qarastyrylǵan. Al Jibek jolynyń tarıhy jaıynda derekti fılm túsirý úshin iri ǵalymdardyń pikirlerine súıenetin bolady.
«Ekspedıtsııa Qazaqstannyń 10 oblysynyń aýmaǵynda bolyp, 30-dan asa tarıhı jáne mádenı ejelgi arheologııalyq eskertkishterdi jáne 3-5 myń jyl burynǵy biregeı tarıhı mańyzy bar oryndardy aralaıdy. Onan soń Reseı arqyly basqa da Jibek joly boıyndaǵy elderge jol tartady. Joba aıasynda 16 eldiń árqaısysynda Qazaqstannyń qazirgi zamanǵy sýretshileriniń týyndylary qoıylǵan kórmeler, «Skıfter altyny» kórmesi jáne t.b. is-sharalar uıymdastyrylady», deıdi ekspedıtsııa jetekshisi Jaqmetbekov Máýlen. Onyń aıtýynsha, joba jumysynan soń, túsirilgen jáne jınaqtalǵan derekter negizinde Uly Jibek joly qalalary týraly ǵylymı-derekti fılmder toptamasy jasalady. Sonymen birge, Qazaqstannyń arhıtektýralyq eskertkishteriniń jańa kartasy, avtokólik joldarynyń kartasy jáne Uly Jibek jolynyń geografııalyq kartasy qurylady dep josparlanǵan.
