Uly Jibek joly týrısterine biryńǵaı vıza berilýi múmkin
ASTANA. QazAqparat - Dúnıejúzilik týrızm uıymnyń «Uly Jibek joly» baǵdarlamasyna qatysatyn memleketter týrıster úshin biryńǵaı vıza engizýdi qarastyryp jatyr, dep habarlaıdy QazAqparat tilshisi.
«Bul bastamany barlyq qatysýshy elder qoldap otyr. Olardyń sany 30-dan asady. Uly Jibek joly - aýqymdy joba, Eýrazııa qurlyǵynyń úlken bóligi. Onyń aýmaǵy shyǵystaǵy Japonııadan Eýropanyń shyǵysyndaǵy Italııaǵa deıin sozylyp jatyr. Shyn máninde bul bastama barlyq elge qatysty, degenmen bastapqyda bul ıdeıany Ortalyq Azııa elderi arasynda iske asyryp kórgimiz keledi», - dedi «Visit Uzbekistan» jobasynyń dırektory Mıhaıl Shamshıdov Astana ótip jatqan Qazaqstan-Ózbekstan týrıstik forýmynda.
M. Shamshıdovtyń aıtýynsha, týrızm salasynda Ózbekstan men Qazaqstan bir-birine básekeles bola almaıdy. Sebebi, Ózbekstan - otyryqshy el retinde týrısterge kóne qalalaryn usynsa, Qazaqstan ejelgi kóshpeli mádenıetimen erekshelenbek.
Buǵan deıin Qazaqstan men Ózbekstannyń týrıster úshin ortaq vıza shyǵaratyny habarlanǵan edi.
«Kazakh Tourism» basshysy Rashıd Kúzembaevtyń aıtýynsha, jyl sońyna deıin biryńǵaı vıza engizý jumystary nátıjesin beredi. Almaty-Tashkent-Buhara-Samarqan baǵyty boıynsha ekonom-rejimdegi saıahat shamamen 500 dollardy quramaq.
«Aldaǵy ýaqytta Tájikstan men Qyrǵyzstan da bul bastamaǵa qosylýy múmkin. Munda ákimshilik máseleler joq, degenmen syrtqy saıası jáne ulttyq qaýipsizdikke qatysty birqatar kúrdeli máseleler bar», - dep tolyqtyrdy sózin R. Kúzembaev.
